祖兒獲阿Sa介紹筍盤 突遭告白嗌嚇死

（星島日報報道）容祖兒《ANOTHER SIDE….JOEY•MY SECRET•LIVE》演唱會前晚於演藝學院舉行首場歌迷場，好姊妹蔡卓妍（阿Sa）、師妹李幸倪、好友林海峰等齊捧場。當晚祖兒分享私密內心世界，大爆阿Sa落力為她介紹筍盤，竟惹來一段驚魂短訊關係！
當晚祖兒談及內心世界，坦言自己已是中女，生活無憂但仍一個人，笑指最緊張其感情着落的人應是姊妹蔡卓妍，「佢有段時間真係好瘋狂，佢應該係全世界最希望我得到幸福的人，最瘋狂的日子，佢見到所有男人，都會落個啱唔啱容祖兒的filter，同我講，你咁可愛又咁搞笑，我係男人我溝你！」
男方短訊叫「baby」
由於不想辜負阿Sa真心認真和熱誠牽綫，因此有次祖兒與她介紹的異性交換電話，並禮貌地斷斷續續以短訊互相問候，「對方見我回多一兩次就開始send自拍照畀我，報告自己生活狀況，我當時都驚一驚，但為尊重阿Sa，我唔識回答，都留個Emoji……佢竟然再努力，留言『I miss you baby！』嗰一刻我真係嚇死！baby後仲唔停！仲話不如我哋一齊試吓發展！」祖兒有感對方不了解她，卻表示已看過她的演唱會、好了解她為人，她不禁笑言：「各位觀眾！睇完晒我演唱會DVD想同我拍拖？你哋由細睇到我大，我係咪要同晒你哋……」即引全場大笑。
此外，前晚不少歌迷按照dress code花盡心思，扮雞、外星人等搞笑造型到場，歌迷更為祖兒補祝上月生日。完騷後，眾人不停叫安歌，近15分鐘才不捨地離場。