【聰心說】如心與夫常互寫遺囑「舊時飛機好危險」

陳振聰撰寫的《聰心說》揭露了龔如心生前與丈夫王德輝為了生意經常各自乘飛機出外公幹，事前二人都會預先寫下一紙遺囑交給對方保管，待對方平安返港後便會撕掉。如心笑說：「舊時啲飛機好危險㗎！飛飛下隨時跌落嚟！」振聰不解地問：「咁點解又寫又撕呢？」如心稱：「有張遺囑，嗰陣覺得唔好意頭嘛！」王德輝有一次墮馬受傷，他忽然覺得人會死，便寫了份遺囑給她，並表示：「如果我死咗，身家性命，都係畀晒老婆，乜人都無，又無仔女，又好憎老竇為人，不務正業，細佬唔關我事，係我老竇性興奮之後嘅結晶品，同我一啲關係都無，老婆就係我自己揀！」（明天待續）

如心說：「王德輝寫給我的遺囑，其中一張寫了＂one life one love＂這句話，其實是王德輝每日都會對我說，是他的『口頭禪』，你都沒有對我這樣說過！」振聰指：「這句話是王德輝拿了專利，我那句是"I love you more than I can say"嘛！」如心指振聰：「你學歌詞，你那麼多人要love，又只有一條命，怎麼會對我one life one love呢？」

陳振聰憶述，九七年五月當他如常到華懋總部見如心時，看見她呆坐在大廳沙發上，動也不動，手上好像拿著甚麼在看，走到她背後，輕拍了她一下肩膊說：「看甚麼如此入神？」如心說：「一早就聽到你入嚟啦！你睇下，細心啲喎！」她遞給我一張中文報紙，並說：「麻煩事嚟喇！」她指着報紙下半版的「尋人啟事」，原來是尋找王德輝的啟事，他問如心：「是你刊登的嗎？」如心一手拉着他步入睡房，他發現房間滿地都是文件，牀上又堆滿不同顏色的文件夾。

如心說：「係佢老竇刊登的，七年了，應該係呢一兩日，王德輝失蹤咗滿七年喇！」振聰指：「佢地知道有我嘅存在咩？」如心緊張地回答：「當然唔知啦！o依家最好唔好畀佢哋知，費事夜長夢多！」振聰奇怪地問：「咁佢哋打算搞甚麼？」如心表示自己早已詢問了律師，「登咗報紙廣告，梗係搵唔到人，咁樣佢哋就可以話王德輝失蹤滿七年，向法庭申請王德輝已經死咗，咁咪可以同我開始爭奪華懋囉！」

「無乜時間㗎喇！打仗嘅嘢，話打就打，我知道好耐之前佢曾經同我鬧交嘅時候，寫過分遺囑畀佢老豆，之後佢話要取消，我就話由佢啦！無幾耐，佢又話寫過分畀我，有一次我跟王德輝去騎馬，佢墮馬受傷入了醫院，佢忽然好認真覺得人會死，所以話真係要寫份遺囑畀我，我咪叫佢自己搞，我唔理，之後佢就交畀我一個密封好的公文袋，我要搵下，一時間我都唔記得係咪放入夾萬內！」如心瞪大雙眼說：「o依家就係要搵返份遺囑出嚟，但我記得份遺囑封死，其實都未必睇得，可能要由法庭拆開先睇得。」

振聰又奇怪地問：「你又話王德輝好憎佢老竇，點解佢又寫份遺囑畀佢老竇？」如心解釋：「嗰陣時有個男人對我好好，王德輝係個醋精王，又話要打人，又去鬧人！」振聰插咀說：「係男人都係醋精啦，我都唔會例外。」如心用右手大力拍他的大腿說：「你去死啦！講到我咁隨便，人哋約我食下飯，我又貪玩，最怕悶，有人陪我行下街，不知幾好，佢個黐線佬，唔知朋友定係私家偵探，竟然跟蹤我，仲影埋相，好緊張咁，啲相咪兩個人係餐廳出黎囉，激到我死，我咪同佢講，唔信我，傾都唔駛傾，一於離婚，於是我就執嘢走囉，費事睬佢。」

如心稱：「佢咪為咗激我，寫張遺囑畀佢老竇，話畀我知，以為我會好緊張，佢真傻，我走快兩步添啦，結果佢咪又求又拜，死晒狗咁，男人就係咁架，龜頭龜尾，呢件事，我就覺得佢無種囉，之後有幾十次話要改番張遺囑，做就唔駛講啦，我就叫佢唔駛改，我話我隨時會走佬，我睬佢都傻，反正大家都無諗過會死，唉！又點知會搞到今日咁！」

振聰聽後說：「你一定好愛佢啦！我都有點醋意。」如心指：「我嫁得畀佢，點會唔愛佢呢？我都跟王德輝表明好憎佢老竇，我都唔鍾意自己細佬妹，阿媽我就有啲尊重，話晒我老竇死得早，不過王德輝唔知點解，特別憎我細佬，我都唔鍾意我細佬，阿媽一向偏心呀！」如心表示：「王德輝分人特別孤獨，近乎有點病態，阿媽同細佬妹嚟我哋家，佢都黑口黑面，有次仲出嚟潑水，搞到我鬼咁尷尬。」

如心說：「佢老竇每次嚟都係要拿錢，佢阿媽就無乜野，佢阿妹就癡癡哋……我一個人食得幾多，講真句，我一日都駛唔到一百蚊，就係激氣佢家人出啲咁嘅手段，又唔開心見誠，同我好好商量下，想入公司做，就應該一早求下大佬，入嚟學嘢！」如心有點激氣地稱：「華懋係我同王德輝創立的，關王家屁事呀，o依家就跳出來，唔通仲要我低聲下氣同佢哋傾，要我咁樣，搵把刀架住我條頸，以我嘅脾氣，咪叫佢哋一刀殺咗我算啦！」

「其實好早之前已同王德輝傾過，如果畀人威脅，大家都不要屈服，所以個次綁架，我咁急於籌錢贖佢，佢都唔知幾嬲，我係好緊張佢，否則我都唔會提出同啲賊講，用我去換王德輝，等佢去籌錢贖我，佢辦法多啲嘛，當時我一個女人，都唔知點好。」振聰見如心有點激動，便用手輕輕掃如心的臉頰。

如心叮囑振聰說：「龔家亦沒有人對華懋、對我同王德輝的生意出過一分力，而且王德輝討厭佢哋每一個人，尤其係我弟弟龔仁心，是千真萬確的事，我一直都好清楚，既然他這麼認真寫在遺囑內，我就一定要確定，如果我他日死了，華懋不可以落在龔家手上的，但王德輝就沒有說過我不可以把華懋交給其他人，他給了我，我喜歡給誰都行，只要不是王家及龔家就行了。」