李辰安 - 唔夠膽食海鮮？｜辰來之筆

大家都想聽下關於食海鮮問題，於是約齊人去茶樓見面，聽下行內人點睇，講時講，有少少肚餓。

香港人愛吃大龍躉。

羅湖有好多美食，近期最多係潮汕牛肉火鍋。

日本福島排出核污水。

部分人對日本海鮮有戒心。

香港人愛吃深海魚。

專家話食深海大魚 過兩年要小心？

張翁講：「今日要讚一下老闆，佢有條大龍躉，留一大塊連皮之魚肉，最好炒西蘭花。」我望下對面大師兄，佢好似有少少唔Like，不過，張翁請大家飲茶，客隨主便，唔好咁多嘢講，你唔啱都應酬下啦。「世侄，食大龍躉，可遇不可求，唔係成日都有。」銀行偉話呢排興飲金羅漢果茶，老闆私人醒佢。「羅漢果唔怕甜，因為呢種果糖係特別的，對血糖友好呀，仲有，對肝臟有益。」

我就無咁多考慮，細個阿婆話羅漢果潤肺，現在又話補肝，總之有益啦，廣東人特別多講究。我原本想問最近熱門話題，就係海鮮是否好值得食，現在先醒起，老闆介紹呢種深海大魚之時，大師兄即時面有難色，如是這般，我都有少少明白，於是收回心裏滿腹疑惑，一於飲杯茶同食個包。

張翁好似睇得穿大師兄心事，等老闆行開之後，開腔話︰「世侄，條魚係南海水域，唔係你鄉下原產地，更何況，現在有得食好食，過多兩、三年就唔好搞啦，專家話嘅。」銀行偉一向食開魚生，唔貴唔食，佢只係話︰「講呢啲！」大家咁話，不如食例牌燒鵝，加一窩上湯瀨粉，清清地都OK。

老闆過嚟同大家吹水，最近佢成日去深圳，搵佢老友潮州佬品茶，現在深圳市面消費亦見熱鬧，但係好多甲級寫字樓空空如也。「無問題，疫情之後，大公司見到Work fromhome都一樣咁順利，於是就Work from home唔好停，慳好多租，唔好咩。」我無話唔好，事關我阿爺無留低幾幢商業大廈畀我，我亦唔係好習慣WFH，着住條睡褲開工，OMG！

潮州佬係茶葉批發老闆，同茶樓老闆一定好多話題。「係囉，潮州佬1997年嚟深圳創業，佢話之前紅印普洱都未炒得起，一餅都係兩千幾三千人仔。」張翁就知道乜嘢係紅印，即是文革前之舊製普洱茶，一筒七片，拍賣價400萬港幣起標。「係啦，單片如果保存得好樣少少都要賣40萬人仔。」老闆話，紅印最早由到內地設廠、賺到盆滿缽滿之台灣同胞炒起。「係呀，上世紀80年代我識嘅台灣廠商，同我晒命，話佢哋現在大把錢，都唔知點使。」

唔食海鮮 去羅湖食潮汕火鍋

可能太多人仔使唔去，於是將紅印普洱當日常飲用，於是由幾千炒到幾萬、十幾萬，再到幾十萬人仔。茶樓老闆後生時行過西環老茶莊，大把紅印普洱，都係二千零蚊，不過，茶莊老闆話，識飲飲茶頭，性價比高。

何謂茶頭？原來都係普洱茶餅之原材料，不過壓茶時有好多濕碎下欄篩咗出嚟，於是集合另製茶頭。「你可以話，成餅靚仔的賣幾千蚊，濕碎茶頭賣兩、三百，原則上都係同源同種，茶莊老人家就話抵飲。」

唔好講咁多，老闆又搵出幾塊茶頭畀大家試下，佢話不適宜沖泡太久，茶壺沖泡洗完第一轉之後，最多分半鐘就OK，再沖散之後，沖泡時間再縮短。「係咪有陣樟木香味？呢批茶頭20年有多，搵日大家去深圳同潮州佬入貨啦。」好，不過，深圳周末、周日好多人，「李生，最好係下午兩點後去，晚上七點之前返，可以避開人流。」

羅湖有好多美食，近期最多係潮汕牛肉火鍋，成行成市，比起香港星級火鍋，抵好多，一半都有，所以唔好成日食海鮮，食下牛肉咪幾好。不過，我成日北上，會否影響本港市面經濟？唉，都係嗰句︰食咗至講！

《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ