李辰安 - 唔够胆食海鲜？｜辰来之笔

大家都想听下关于食海鲜问题，于是约齐人去茶楼见面，听下行内人点睇，讲时讲，有少少肚饿。

香港人爱吃大龙趸。

罗湖有好多美食，近期最多系潮汕牛肉火锅。

日本福岛排出核污水。

部分人对日本海鲜有戒心。

香港人爱吃深海鱼。

专家话食深海大鱼 过两年要小心？

张翁讲：「今日要赞一下老板，佢有条大龙趸，留一大块连皮之鱼肉，最好炒西兰花。」我望下对面大师兄，佢好似有少少唔Like，不过，张翁请大家饮茶，客随主便，唔好咁多嘢讲，你唔啱都应酬下啦。「世侄，食大龙趸，可遇不可求，唔系成日都有。」银行伟话呢排兴饮金罗汉果茶，老板私人醒佢。「罗汉果唔怕甜，因为呢种果糖系特别的，对血糖友好呀，仲有，对肝脏有益。」

我就无咁多考虑，细个阿婆话罗汉果润肺，现在又话补肝，总之有益啦，广东人特别多讲究。我原本想问最近热门话题，就系海鲜是否好值得食，现在先醒起，老板介绍呢种深海大鱼之时，大师兄即时面有难色，如是这般，我都有少少明白，于是收回心里满腹疑惑，一于饮杯茶同食个包。

张翁好似睇得穿大师兄心事，等老板行开之后，开腔话︰「世侄，条鱼系南海水域，唔系你乡下原产地，更何况，现在有得食好食，过多两、三年就唔好搞啦，专家话嘅。」银行伟一向食开鱼生，唔贵唔食，佢只系话︰「讲呢啲！」大家咁话，不如食例牌烧鹅，加一窝上汤濑粉，清清地都OK。

老板过嚟同大家吹水，最近佢成日去深圳，搵佢老友潮州佬品茶，现在深圳市面消费亦见热闹，但系好多甲级写字楼空空如也。「无问题，疫情之后，大公司见到Work fromhome都一样咁顺利，于是就Work from home唔好停，悭好多租，唔好咩。」我无话唔好，事关我阿爷无留低几幢商业大厦畀我，我亦唔系好习惯WFH，着住条睡裤开工，OMG！

潮州佬系茶叶批发老板，同茶楼老板一定好多话题。「系罗，潮州佬1997年嚟深圳创业，佢话之前红印普洱都未炒得起，一饼都系两千几三千人仔。」张翁就知道乜嘢系红印，即是文革前之旧制普洱茶，一筒七片，拍卖价400万港币起标。「系啦，单片如果保存得好样少少都要卖40万人仔。」老板话，红印最早由到内地设厂、赚到盆满钵满之台湾同胞炒起。「系呀，上世纪80年代我识嘅台湾厂商，同我晒命，话佢哋现在大把钱，都唔知点使。」

唔食海鲜 去罗湖食潮汕火锅

可能太多人仔使唔去，于是将红印普洱当日常饮用，于是由几千炒到几万、十几万，再到几十万人仔。茶楼老板后生时行过西环老茶庄，大把红印普洱，都系二千零蚊，不过，茶庄老板话，识饮饮茶头，性价比高。

何谓茶头？原来都系普洱茶饼之原材料，不过压茶时有好多湿碎下栏筛咗出嚟，于是集合另制茶头。「你可以话，成饼靓仔的卖几千蚊，湿碎茶头卖两、三百，原则上都系同源同种，茶庄老人家就话抵饮。」

唔好讲咁多，老板又搵出几块茶头畀大家试下，佢话不适宜冲泡太久，茶壶冲泡洗完第一转之后，最多分半钟就OK，再冲散之后，冲泡时间再缩短。「系咪有阵樟木香味？呢批茶头20年有多，搵日大家去深圳同潮州佬入货啦。」好，不过，深圳周末、周日好多人，「李生，最好系下午两点后去，晚上七点之前返，可以避开人流。」

罗湖有好多美食，近期最多系潮汕牛肉火锅，成行成市，比起香港星级火锅，抵好多，一半都有，所以唔好成日食海鲜，食下牛肉咪几好。不过，我成日北上，会否影响本港市面经济？唉，都系嗰句︰食咗至讲！

《星岛头条》APP经已推出最新版本，请立即更新，浏览更精彩内容：https://bit.ly/3yLrgYZ