網民力數香港侍應6宗罪！黑口黑面/零服務/自助斟水 最離譜是XX要收錢？
2023-08-14 00:00 
最近有港人在Facebook群組「飲食黑店大全 (全港食店質素關注組)」發文，大呻在餐廳經常遇到的不快經歷，矛頭直指香港侍應，怒轟餐廳侍應服務態度欠奉，更力數6宗罪，當中包括黑口黑面、態度差等等，最離譜是一樣常見的物品要收錢？令樓主直呼「香港嘅侍應係咪已經唔當入嚟食嘢嘅人係客？」帖文隨即引起網民熱議，不過意見兩極，不知大家對樓主的控訴又有沒有共鳴？
網民力數香港侍應6宗罪1.黑口黑面
樓主大呻大部分餐廳侍應態度欠奉，亳無笑容之餘更對客人黑口黑面！「一入去，侍應已經X口X面問你『幾位呀？』」樓主更指「連『歡迎光臨』四個字都無！」令樓主感覺不被尊重：「好似入嚟食嘢得罪佢咁」。
網民力數香港侍應6宗罪2.無得揀位被逼「搭枱」
樓主又指在餐廳進食「基本上無得揀位」，食客不能任意選擇座位，「就算勉強揀位，兩人坐了坐4人卡位，都會好快格硬坐多2條友入嚟！」
網民力數香港侍應6宗罪3. QR code落單
樓主發現有不少餐廳轉了QR code（二維碼）下單點食物，樓主表示有時在不知情的情況下舉手叫侍應，便會被指責「你試下自己嘟QR code先啦！」令他感到不方便。
網民力數香港侍應6宗罪4.自助形式零服務
樓主亦不滿餐廳零服務，不少餐廳轉用自助形式供應飲用水、餐具等等，樓主指：「如果叫人拎杯水，又會被人X『自己出去斟啦！』無錯……原來已經很多餐廳要求客人自己出去斟水。」
網民力數香港侍應6宗罪5. 紙巾收費
有時進食完需要紙巾擦嘴，沒有帶備紙巾向餐廳索取是人之常情，有些餐廳會免費提供紙巾，不過有些餐廳則要額外收費。有次樓主向餐廳「拎張紙巾」，卻被告知「3蚊1包」，驚訝發現：「唔知幾時開始拎紙巾要收錢？」
網民力數香港侍應6宗罪6.碎碎念鬧客
樓主最後表示，侍應不但黑口黑面、亳無笑容，有時會聽到侍應碎碎念鬧客，「有時會聽到侍應口噏噏講：『X，今日咁多人㗎，好心咪X入嚟，食過第2間啦！』」
網民力數香港侍應6宗罪！網民意見兩極：QR code落單仲要收加一 VS 西客 VS 飲食業唔休做
樓主的帖文引起網民熱議，當中意見兩極，有部分網民感示有同感：「而家先知？去食餐飯要求佢咁」、「有招呼你都算好！我試過個收銀自己開咗張單，就自己行左去，乜嘢都冇同我講，之後行返過嚟鬧我話唔跟住佢行。」、「我入嚟消費係享受！食要自己落單仲要收加一嘅服務費？」、「而家真係大部分茶餐廳文化都係咁」、「我之前喺某茶記，叫牛扒畀咗雞扒我，嗰個阿姐仲揸主意錯兩份淨係換一份畀我，跟住我問佢點解，佢仲要西面回應問我：『咁你食唔食呀？』真係火滾以後都冇幫襯！」、「上個禮拜去深圳食嘢，服務態度好到真係令我懷疑人生，香港已經冇得救啦！」、「其實好多連做人基本禮貌都冇，仲要收10%服務費」。
不過亦有部分網民持相反意見，認為樓主是「西客」，不理解服務業難處：「要乜服務都有就去五星大酒店啦，有時要體諒吓人哋人手唔夠，仲要幫你呢樣嗰樣！！」、「人哋都係打份工啫，就係因為有你呢種人覺得好多嘢都係應份要畀你，所以有得揀啲人都唔會做餐飲」、「香港食客係咪永遠覺得顧客是上帝，以為香港係日本？」、「其實以上講呢啲，我完全包容到，因為已經顯示咗喺食物價錢上」、「自己斟水有乜問題？人手唔夠，個個要水咪好唔得閒；紙巾收費？合理呀，我見過啲人真係好浪費、好貪心」、「咩叫『歡迎光臨』都無？呢句野對你入嚟食嘢有咩意義」、「客唔係大晒，搞清楚一樣嘢，係你有求於人，你想要人哋嘅服務，冇人逼你要幫襯佢，憑咩要人哋就你？」。
亦有網民認為服務業生態「今時唔同往日」，飲食業「唔休做」：「主要係供求問題，回想起多年前SARS沙士期間，好多商戶酒樓執笠，失業率高企。曾經入去機場美心食晚飯，全場兩台枱分別共四人，你肯入去幫襯就係貴賓一樣。」、「主因係以前服務好，客會畀貼士直接落番侍應袋，咁佢自不然會好招呼；而家全部加一又無貼士，畀著你做侍應都唔想你行入嚟，可以做少啲。」、「而家唔休做，因為復常後大把生意，上年疫情期間，間間堂食有折扣，外賣如是，入去當你神咁拜。」。
延伸閱讀：港女狠批上環越南餐廳賣鴨仔蛋「不文明」呼籲抵制 店家2大原因堅持賣
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
最新回應