李辰安 - Barbie我鍾意｜辰來之筆
2023-08-15 00:00 
唔係呃你 我都玩芭比公仔
我都有玩芭比公仔，真的，唔係呃你，故事是怎麼說呢？現在趕過去中環小酒館，準備同大家吹水。
今日工作忙碌，事關立秋都過咗，好快又一年，公司要交好多功課，如果再唔博殺，好快就要被退休。「使乜驚，返大灣區休息下啦。」你真係講笑，我唔係譚校長，可以繼續開演唱會同踢波，我返去搬磚都無人請，送外賣又無本事，唔通去賣港式奶茶？「都好，安仔你好有飲茶心得，內地開茶檔可以上市，後生仔二十幾歲就可以做奶茶天王，有得諗。」
大家坐定定，先來一杯大啤酒，互相祝賀身體健康，張翁去完深圳，成個人精神晒。「係呀，有個好有錢朋友請我同幾個行家去深圳玩，參觀完佢嗰間幾億元豪宅，即時心曠神怡，望住青山一片綠油油，即時忘記俗務。」深圳現在好巴閉，高級商場好高級，全世界名牌齊晒，威水過香港，「我雖然無乜興趣Shopping，不過，睇見都開心。」
對，內地幾好都有，現在除咗包包、時裝之外，由電動汽車到電子產品，國產大晒，歐美日品牌都無乜料到。「我嗰位深圳有錢朋友，都有幾架歐洲超級豪車，不過，都係燃油引擎，懷舊Feel，其實國產新推出好豪之電動老闆車，好掂。」
靚仔侍應碧咸仔行過嚟問下大家有無興趣開支中國白酒，「咦，咁潮，真係要試下。」原來三年疫情打擊，內地高價白酒，如飛天茅台之類，唔係太過暢銷，但係中下價白酒就非常之好賣，於是酒館老闆貪得意，入咗一批好流行之白酒，試下香港人可會接受。
「老闆話，中環呢頭越來越多講普通話嘅年輕才俊，國產白酒啱Key過日本清酒。」碧咸仔二話不說送上白酒，一打開，酒香飄飄四處聞。「不過大家唔好飲得太急，事關度數好高，慢慢嚟，唔使急喎。」講開又講，大家有無捧下世界大學生運動會，碧咸仔話有，「不過，唔係睇足球，而係睇女子籃球。」
好酒，唔知可唔可以加冰加蘇打水？碧咸仔介紹，可以加檸檬片，落塊檸檬片後用雞尾酒瓶搖呀搖，搖到檸檬入味，打開就係一種好有型之品味白酒。銀行偉話，佢都有睇大學生女子籃球，因為有一位「大寶貝」劉禹彤出場。原來大師兄都係「粉絲」。「勁呀，佢喺籃底一個撞低三個，然後再攞分兼博對方犯規，同日本隊決賽嗰場，睇到成個人跳起咁興奮。」上網一搜，呢位大寶貝雖然屬航空母艦級，但好Cutie，個樣精緻過「細細粒」，一舉一動好似熊貓咁得意。
人間芭比Lisa 紅遍世界
唉，今時今日，唔怪得知美國文化符號芭比娃娃都無辦法打動得到中國消費者。「係呀，你仲Sell芭比娃娃三圍39、18、33吋，身高5呎6吋？睇下劉禹彤，係身高兩米零一，110公斤重！即係兩個芭比加埋一齊，呢個標準先至係偶像。」
張翁話，芭比1959年面世，如果真人嘅話，退休做奶奶，個孫都差唔多大學畢業啦，點可以再做文化符號。「大家知唔知，我收埋一個芭比公仔當玩具。」成班人包括碧咸仔，聽到幾乎跌低。我就先敬大家一杯壓下驚。「你哋聽埋我講先啦。」飲咗一啖檸檬白酒，成個人爽晒。「辰哥，乜你都係雙重人格？」講乜呀，我收藏嘅係「人間芭比」Blackpink嗰位Lisa嘅人形公仔。「都係啫，幾十歲玩啲咁嘢！」大哥呀，係公司女同事喺韓國買嘅手信。唏，費事同你講，飲酒啦！
最新回應