李辰安 - Barbie我锺意｜辰来之笔
2023-08-15 00:00 
唔系呃你 我都玩芭比公仔
我都有玩芭比公仔，真的，唔系呃你，故事是怎么说呢？现在赶过去中环小酒馆，准备同大家吹水。
今日工作忙碌，事关立秋都过咗，好快又一年，公司要交好多功课，如果再唔博杀，好快就要被退休。「使乜惊，返大湾区休息下啦。」你真系讲笑，我唔系谭校长，可以继续开演唱会同踢波，我返去搬砖都无人请，送外卖又无本事，唔通去卖港式奶茶？「都好，安仔你好有饮茶心得，内地开茶档可以上市，后生仔二十几岁就可以做奶茶天王，有得谂。」
大家坐定定，先来一杯大啤酒，互相祝贺身体健康，张翁去完深圳，成个人精神晒。「系呀，有个好有钱朋友请我同几个行家去深圳玩，参观完佢嗰间几亿元豪宅，即时心旷神怡，望住青山一片绿油油，即时忘记俗务。」深圳现在好巴闭，高级商场好高级，全世界名牌齐晒，威水过香港，「我虽然无乜兴趣Shopping，不过，睇见都开心。」
对，内地几好都有，现在除咗包包、时装之外，由电动汽车到电子产品，国产大晒，欧美日品牌都无乜料到。「我嗰位深圳有钱朋友，都有几架欧洲超级豪车，不过，都系燃油引擎，怀旧Feel，其实国产新推出好豪之电动老板车，好掂。」
靓仔侍应碧咸仔行过嚟问下大家有无兴趣开支中国白酒，「咦，咁潮，真系要试下。」原来三年疫情打击，内地高价白酒，如飞天茅台之类，唔系太过畅销，但系中下价白酒就非常之好卖，于是酒馆老板贪得意，入咗一批好流行之白酒，试下香港人可会接受。
「老板话，中环呢头越来越多讲普通话嘅年轻才俊，国产白酒啱Key过日本清酒。」碧咸仔二话不说送上白酒，一打开，酒香飘飘四处闻。「不过大家唔好饮得太急，事关度数好高，慢慢嚟，唔使急喎。」讲开又讲，大家有无捧下世界大学生运动会，碧咸仔话有，「不过，唔系睇足球，而系睇女子篮球。」
好酒，唔知可唔可以加冰加苏打水？碧咸仔介绍，可以加柠檬片，落块柠檬片后用鸡尾酒瓶摇呀摇，摇到柠檬入味，打开就系一种好有型之品味白酒。银行伟话，佢都有睇大学生女子篮球，因为有一位「大宝贝」刘禹彤出场。原来大师兄都系「粉丝」。「劲呀，佢喺篮底一个撞低三个，然后再攞分兼博对方犯规，同日本队决赛嗰场，睇到成个人跳起咁兴奋。」上网一搜，呢位大宝贝虽然属航空母舰级，但好Cutie，个样精致过「细细粒」，一举一动好似熊猫咁得意。
人间芭比Lisa 红遍世界
唉，今时今日，唔怪得知美国文化符号芭比娃娃都无办法打动得到中国消费者。「系呀，你仲Sell芭比娃娃三围39、18、33寸，身高5尺6寸？睇下刘禹彤，系身高两米零一，110公斤重！即系两个芭比加埋一齐，呢个标准先至系偶像。」
张翁话，芭比1959年面世，如果真人嘅话，退休做奶奶，个孙都差唔多大学毕业啦，点可以再做文化符号。「大家知唔知，我收埋一个芭比公仔当玩具。」成班人包括碧咸仔，听到几乎跌低。我就先敬大家一杯压下惊。「你哋听埋我讲先啦。」饮咗一啖柠檬白酒，成个人爽晒。「辰哥，乜你都系双重人格？」讲乜呀，我收藏嘅系「人间芭比」Blackpink嗰位Lisa嘅人形公仔。「都系啫，几十岁玩啲咁嘢！」大哥呀，系公司女同事喺韩国买嘅手信。唏，费事同你讲，饮酒啦！
最新回应