劉國業 – 老盤復興｜Hi Fi 聖杯
2023-08-17 00:00 
輾轉難眠，皆因糾結應否收個小三。千萬唔好誤會，在下用情專一，只係衰在Hi Fi手上，情陷不同夢幻鉻器，念及佢哋玲瓏浮凸的倩影、嬌嗲醉人的美聲，就情不自禁，左擁右抱，統統入宮。
最近念念不忘係一個來自瑞士的「長者」，有約八十歲高齡的老唱盤Thorens TD124。自認已經擁有一個Denon，係上世紀七十年代的直驅盤，播黑膠音樂，生氣勃勃，令人聞歌起舞。仲有一個小二德國Clearaudio Champion全透明亞加力膠帶動盤，話係入門版，但阿叔我聽得好開心，寵愛有加！點知逛深水埗，遇上Thorens TD124，佢老，但冇緊要，法國總統馬克龍教曉世間男，年紀唔重要，最緊要知道自己需要乜嘢。 
Thorens TD124造工精巧，聲音純美，傾倒眾生。
Thorens TD124造工精巧，聲音純美，傾倒眾生，仲有唔少專利發明，售價不平，當年只有富豪級發燒友負擔得起，仲係專業大電台必備裝置。聽過佢播黑膠，音樂感情豐富，女聲令人暈得一陣陣。單盤盛惠逾兩萬銀，貴？一啲唔貴。
文、圖：劉國業
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
關鍵字
最新回應