劉國業–敗家玩 Hi Fi｜HIFI聖杯

細細個，阿媽教誨，玩音響，敗家，囑咐我，呢種陋習千祈唔好染上。自少聽阿媽話，循規蹈矩做人，自問係一個99%的孝順仔，少了那1%，去咗邊？就係衰在玩 Hi Fi！萬事萬物，最怕有追求，為了好聽點，不惜腰間錢，投入好多，只係提高少少質量，完全不成比例。當音樂接近現場音樂一點，開心到成晚唔瞓，狂煲碟。

手中這條丹麥精製的電源線，令成套架罉更生猛。

 

玩音響怎敗家？舉例，普通人買紅黑喇叭線，十幾二十蚊一呎，已經聽得好過癮，但發燒友幾千蚊一呎算平，以萬元計亦平常，難明的技術名詞不多講，單講物料，花樣百出，有合金、無氧銅、超低溫冷凍金屬等等，用上純銀的品牌多的是，還有廠會加入黃金……一條三米喇叭線盛惠幾萬元，算平了，叫價過十萬亦大有市場。

我手中這條丹麥精製的電源線，不在這裏公開價錢，怕家中「老虎乸」認出，揭發我講大話以蔗渣價買來，咁就家無寧日嘞！花錢，換來靚供電，成套架罉更生猛，高音微絲細眼，中音尤其人聲真到暈，低音徐徐迎面撲埋身，仲有高貴感、現場感，呢個時候，錢只係數字，唔重要！
文、圖：劉國業

《星島頭條》APP經已推出最新版本，請立即更新，瀏覽更精彩內容： https://bit.ly/3yLrgYZ