李辰安 - 搶人才｜辰來之筆

為咗搶人才，費盡苦心，終於見效啦！我鄉下阿叔個仔同孫都想嚟香港發展，甚至今年70歲出頭嘅阿叔都話有興趣過嚟！

最近不少內地工程師都來港工作。

香港政府搶人才，不少內地人都願意來港居住和工作。

內地機構開辦展覽會，徵聘人才。

香港出現移民潮，因此需要補充大量人才。

香港職業展覽吸引不少人參觀。

依家有本事 隨時申請嚟

大師兄首先開口講：「老婆個表弟最近都問香港咩環境，聽講之前好難申請過嚟，依家有本事就得嘞，至少省卻好多繁文縟節。」今日飲茶，好想食冬瓜盅。「李先，唔好意思，今日賣晒啦，不如食個魚肚羹，落足料，包你滿意。」好似係兩樣嘢，即係等如無叉燒包，你叫我食住個巨無霸，呢啲就正一九唔搭八，不過，無謂咁唔畀面，好啦，好啦，我係順德人。

「係噃，我老婆個表弟真係順德人，聽講有個讀小學嘅細女，讀書好煩，大灣區大城市各樣成本都貴，尤其是讀書，補習班多過便利店，家長同學生都好頻撲。」大家都話鳳城煎魚餅好味，但無大良炒牛奶。「表弟話不如落嚟香港啦，呢度搶人才，佢係IT人，相信一定搵到好工，最緊要係香港讀書競爭無咁激烈，個女讀到DSE憑香港人身分，返去內地再考大學有優惠，好易入到名校，咁就可以行少冤枉路。」

大灣區係時候大兜亂啦。「安仔，你都九唔搭八，呢啲叫做大融合，噏得出就噏，你有讀過書無？」好似唔多有讀過書，鄉下大學幾年玩多過讀書，不過，大師兄你就最鍾意去圖書館，等女同學同你溫習，所以你好勤力。「世侄，可憐天下父母心，我有個好夥計，做埋暑假同個女去英國，唔係移民亦唔係搵到工，淨係陪個女讀大學，讀完再返香港，算係盡咗為人老竇之責任，我真係畀佢激死。」張翁抱怨說。

有一個咁盡責嘅老竇，好難搵，但個女未必領情，長大之後要有自由，你又跟着我去英國，想點？幫我做家務，OK，開車包接送？都可以，唔該晒，不過，我要去拍拖，點好呢？同朋友、同學露營，你又一起嚟呀，Oh My God！

名牌要進步 增中國元素？
 

「講開自由，英國對面法蘭西就全國追求自由，成條街畀班年輕人裝修，成地都係名牌。」大家無搭嘴，掛住食叉燒包。「世侄，食飯唔好講政治，不如講下幾時同你過台灣食牛肉麵。」

講開個魚肚羹，料就豐足，瑤柱、魚肚樣樣齊，不過，魚肚可以發得透啲，依家食落口有少少硬，恕我有要求。不過，我唔會講出聲，費事老闆尷尬，總之下次都係要冬瓜盅，如果賣晒就點個海鮮豆腐湯。「台灣要搭飛機，咁就不如坐高鐵，近近哋去廣州行下。」我話最好明星足球隊再去村超踢波，大家去貴州捧場兼旅行，嗰度好有特色，少數民族別有風貌。

「聽講仲有鬥牛睇，兩隻大水牛，一二三迎頭對撞，睇下邊隻頂得順無暈低。」大師兄話︰「安仔，依家內地周圍落雨，睇定啲先，廣州OK，不過，攝氏三十幾度行上下九路，都幾辛苦。」

早排世界首富兼法國名牌集團老闆去完內地就嚟尖沙嘴巡視業務，三年疫情過後，估計大眾消費模式有改變，天下名牌都要與時俱進，認真諗下計，我認為一定要增加中國元素先至得。銀行偉話︰「行過尖沙嘴所見之名牌衫、名牌包包，個個都有雞乸咁大個品牌名字，真係好有香港和內地特色，原產地唔興呢種風格，只有運動衫先至咁設計。」係，咁又點呢？「不如玩盡啲，前面雞乸咁大個洋文名，後面就大大個中國字品牌，中西合璧，你話有無得諗？」我就唔會諗，食燒賣啦！
 

《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ