李辰安 - 抢人才｜辰来之笔

为咗抢人才，费尽苦心，终于见效啦！我乡下阿叔个仔同孙都想嚟香港发展，甚至今年70岁出头嘅阿叔都话有兴趣过嚟！

最近不少内地工程师都来港工作。

香港政府抢人才，不少内地人都愿意来港居住和工作。

内地机构开办展览会，徵聘人才。

香港出现移民潮，因此需要补充大量人才。

香港职业展览吸引不少人参观。

依家有本事 随时申请嚟

大师兄首先开口讲：「老婆个表弟最近都问香港咩环境，听讲之前好难申请过嚟，依家有本事就得嘞，至少省却好多繁文缛节。」今日饮茶，好想食冬瓜盅。「李先，唔好意思，今日卖晒啦，不如食个鱼肚羹，落足料，包你满意。」好似系两样嘢，即系等如无叉烧包，你叫我食住个巨无霸，呢啲就正一九唔搭八，不过，无谓咁唔畀面，好啦，好啦，我系顺德人。

「系噃，我老婆个表弟真系顺德人，听讲有个读小学嘅细女，读书好烦，大湾区大城市各样成本都贵，尤其是读书，补习班多过便利店，家长同学生都好频扑。」大家都话凤城煎鱼饼好味，但无大良炒牛奶。「表弟话不如落嚟香港啦，呢度抢人才，佢系IT人，相信一定搵到好工，最紧要系香港读书竞争无咁激烈，个女读到DSE凭香港人身分，返去内地再考大学有优惠，好易入到名校，咁就可以行少冤枉路。」

大湾区系时候大兜乱啦。「安仔，你都九唔搭八，呢啲叫做大融合，噏得出就噏，你有读过书无？」好似唔多有读过书，乡下大学几年玩多过读书，不过，大师兄你就最锺意去图书馆，等女同学同你温习，所以你好勤力。「世侄，可怜天下父母心，我有个好夥计，做埋暑假同个女去英国，唔系移民亦唔系搵到工，净系陪个女读大学，读完再返香港，算系尽咗为人老窦之责任，我真系畀佢激死。」张翁抱怨说。

有一个咁尽责嘅老窦，好难搵，但个女未必领情，长大之后要有自由，你又跟着我去英国，想点？帮我做家务，OK，开车包接送？都可以，唔该晒，不过，我要去拍拖，点好呢？同朋友、同学露营，你又一起嚟呀，Oh My God！

名牌要进步 增中国元素？
 

「讲开自由，英国对面法兰西就全国追求自由，成条街畀班年轻人装修，成地都系名牌。」大家无搭嘴，挂住食叉烧包。「世侄，食饭唔好讲政治，不如讲下几时同你过台湾食牛肉面。」

讲开个鱼肚羹，料就丰足，瑶柱、鱼肚样样齐，不过，鱼肚可以发得透啲，依家食落口有少少硬，恕我有要求。不过，我唔会讲出声，费事老板尴尬，总之下次都系要冬瓜盅，如果卖晒就点个海鲜豆腐汤。「台湾要搭飞机，咁就不如坐高铁，近近哋去广州行下。」我话最好明星足球队再去村超踢波，大家去贵州捧场兼旅行，嗰度好有特色，少数民族别有风貌。

「听讲仲有斗牛睇，两只大水牛，一二三迎头对撞，睇下边只顶得顺无晕低。」大师兄话︰「安仔，依家内地周围落雨，睇定啲先，广州OK，不过，摄氏三十几度行上下九路，都几辛苦。」

早排世界首富兼法国名牌集团老板去完内地就嚟尖沙嘴巡视业务，三年疫情过后，估计大众消费模式有改变，天下名牌都要与时俱进，认真谂下计，我认为一定要增加中国元素先至得。银行伟话︰「行过尖沙嘴所见之名牌衫、名牌包包，个个都有鸡乸咁大个品牌名字，真系好有香港和内地特色，原产地唔兴呢种风格，只有运动衫先至咁设计。」系，咁又点呢？「不如玩尽啲，前面鸡乸咁大个洋文名，后面就大大个中国字品牌，中西合璧，你话有无得谂？」我就唔会谂，食烧卖啦！
 

《星岛头条》APP经已推出最新版本，请立即更新，浏览更精彩内容：https://bit.ly/3yLrgYZ