李辰安 - 無舞跳啦！｜辰來之筆

成功電視劇日日有新聞
 

以上世紀八十年代尖東舞廳做背景的電視劇，成功引起話題。《一舞傾城》劇照

尖東夜總會曾經是香港人銷金窩。《一舞傾城》劇照

尖東夜總會曾經是香港人銷金窩。《一舞傾城》劇照

尖東夜總會曾經是香港人銷金窩。《一舞傾城》劇照

昔年夜總會金壁輝煌。

以上世紀八十年代尖東舞廳做背景的電視劇，成功引起話題。《一舞傾城》劇照

尖東夜總會曾經是香港人銷金窩。《一舞傾城》劇照

昔年夜總會金壁輝煌。

昔年夜總會有一個大舞池。

已結業的中國城夜總會。

電視劇真好睇，日日都有新聞，證明就係成功，之不過，有人話「馬照跑，舞照跳」不是好東西，會破壞風氣，咁我就無意見嘞！

今日天氣依然酷熱，我有點悶悶不樂，因為「舞劇」（電視劇《一舞傾城》）大結局，人生即將少咗一點點意義。「安仔，你都九唔搭八，咁大個人仲追劇，你以為自己係青春少年？」大師兄對大台電視劇好有成見，當中有一個好曲折故事，真係唔講你唔知。話說好多年前，佢同我喺鄉下讀書嗰陣，校園拍拖被視為僅次於戴四方帽的成就，大師兄好雀躍想識隔籬系嗰位女同學，於是一上堂就嚟料，又送紙仔畀人，想人約黃昏後，又厚住面皮問功課，不過，呢位有三分似張曼玉之女同學，次次都回應︰「我真係好忙。」

張翁聽到呢度，成個人精神晒，暑氣全消咁問︰「世侄，結果大師兄有乜計？」銀行偉原本同靚仔侍應碧咸仔講波經，想話去北京捧美斯場，點知連炒飛都難求……聽到有校園舊事，仲要係大師兄緋聞，馬上走過來，好想知多啲。

我就話天氣熱，如果大家請我飲杯冰凍啤酒，我休息下就同大家分享。「大師兄，你無問題吖嘛！」你知啦，事關人家私隱，我都要循例問下對方，費事畀人批評我無家教。「陳年舊事有乜好講，不過，講亦無拘啦，反正大家吹水，不如由我親口講述，好過畀安仔亂咁噏。」大家都贊成大師兄真人Show，碧咸仔都話想知，你話大師兄係咪有人面呢？

尖東舞國是香港文化遺產
 

「當年嗰位女同學次次都畀我食檸檬，我有一刻對自己的顏值與魅力出現信心危機。」不過，大師兄好有鬥志，為了想知道被派檸檬之理由，於是出動廣泛人脈關係，打聽一下對方平日喺宿舍做乜，真係咁忙咩？「世侄，女仔一定有矜持啦，唔一定關你事，係嘞，你搵到真相未？」大師兄話，不如飲多杯先啦，最好有少少嘢食。

「大師兄，唔好打拉布啦，快啲講你個故事，最後點收科。」今日又唔係跑夜馬，使乜咁心急？我幫佢Order個迷你漢堡包，人生要慢活，聽故事要有耐心。「嗱，經過我深入調查之後，原來呢位女同學，晚晚都追劉華嘅電視劇，追到入晒迷，仲有呀，佢間房貼晒劉華之大小海報，如是者，我就被拒諸門外。」

等我補充一下，大師兄從此就對電視劇無好感。「如果我無估錯，大師兄認為當年如果無電視劇，女同學應該會應約，事關大師兄都有三分似劉華，誰知電視劇累事咁話。」大師兄又話我九唔搭八。「安仔，你又唔係妹妹仔，晚晚追劇，確係有少少搞笑。」

講開套電視劇，令我懷念上世紀八、九十年代香港之黃金歲月，尖東是世界聞名之地，好多外國人，尤其是日本人，嚟到香港開會一定要去尖東娛樂，此情此景在尖沙嘴已經消失了。「又話馬照跑和舞照跳，點知香港已經無人跳嗰種舞，你話係唔係好奇怪？」張翁話︰「唔係香港風氣有乜改變，原因一係香港租貴，二係香港消費力低迷，所以一個曾經盛況空前嘅行業都無咗，尖東舞國同塘西歲月都列入香港文化遺產。」

銀行偉話，澳門都曾經承接香港舞國風雲，上世紀九十年代都哄動一時，依家亦變成集體回憶。「係噃，不如下星期過澳門行下，好耐無食過杏仁餅。」我話最好食都係澳門老婆餅，嗱，星期五晚過大海，住下酒店，再玩一個周末，好唔好？

 

《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ