李辰安 - 无舞跳啦！｜辰来之笔
2023-06-13 00:00 
成功电视剧日日有新闻
电视剧真好睇，日日都有新闻，证明就系成功，之不过，有人话「马照跑，舞照跳」不是好东西，会破坏风气，咁我就无意见嘞！
今日天气依然酷热，我有点闷闷不乐，因为「舞剧」（电视剧《一舞倾城》）大结局，人生即将少咗一点点意义。「安仔，你都九唔搭八，咁大个人仲追剧，你以为自己系青春少年？」大师兄对大台电视剧好有成见，当中有一个好曲折故事，真系唔讲你唔知。话说好多年前，佢同我喺乡下读书嗰阵，校园拍拖被视为仅次于戴四方帽的成就，大师兄好雀跃想识隔篱系嗰位女同学，于是一上堂就嚟料，又送纸仔畀人，想人约黄昏后，又厚住面皮问功课，不过，呢位有三分似张曼玉之女同学，次次都回应︰「我真系好忙。」
张翁听到呢度，成个人精神晒，暑气全消咁问︰「世侄，结果大师兄有乜计？」银行伟原本同靓仔侍应碧咸仔讲波经，想话去北京捧美斯场，点知连炒飞都难求……听到有校园旧事，仲要系大师兄绯闻，马上走过来，好想知多啲。
我就话天气热，如果大家请我饮杯冰冻啤酒，我休息下就同大家分享。「大师兄，你无问题吖嘛！」你知啦，事关人家私隐，我都要循例问下对方，费事畀人批评我无家教。「陈年旧事有乜好讲，不过，讲亦无拘啦，反正大家吹水，不如由我亲口讲述，好过畀安仔乱咁噏。」大家都赞成大师兄真人Show，碧咸仔都话想知，你话大师兄系咪有人面呢？
尖东舞国是香港文化遗产
「当年嗰位女同学次次都畀我食柠檬，我有一刻对自己的颜值与魅力出现信心危机。」不过，大师兄好有斗志，为了想知道被派柠檬之理由，于是出动广泛人脉关系，打听一下对方平日喺宿舍做乜，真系咁忙咩？「世侄，女仔一定有矜持啦，唔一定关你事，系嘞，你搵到真相未？」大师兄话，不如饮多杯先啦，最好有少少嘢食。
「大师兄，唔好打拉布啦，快啲讲你个故事，最后点收科。」今日又唔系跑夜马，使乜咁心急？我帮佢Order个迷你汉堡包，人生要慢活，听故事要有耐心。「嗱，经过我深入调查之后，原来呢位女同学，晚晚都追刘华嘅电视剧，追到入晒迷，仲有呀，佢间房贴晒刘华之大小海报，如是者，我就被拒诸门外。」
等我补充一下，大师兄从此就对电视剧无好感。「如果我无估错，大师兄认为当年如果无电视剧，女同学应该会应约，事关大师兄都有三分似刘华，谁知电视剧累事咁话。」大师兄又话我九唔搭八。「安仔，你又唔系妹妹仔，晚晚追剧，确系有少少搞笑。」
讲开套电视剧，令我怀念上世纪八、九十年代香港之黄金岁月，尖东是世界闻名之地，好多外国人，尤其是日本人，嚟到香港开会一定要去尖东娱乐，此情此景在尖沙嘴已经消失了。「又话马照跑和舞照跳，点知香港已经无人跳嗰种舞，你话系唔系好奇怪？」张翁话︰「唔系香港风气有乜改变，原因一系香港租贵，二系香港消费力低迷，所以一个曾经盛况空前嘅行业都无咗，尖东舞国同塘西岁月都列入香港文化遗产。」
银行伟话，澳门都曾经承接香港舞国风云，上世纪九十年代都哄动一时，依家亦变成集体回忆。「系噃，不如下星期过澳门行下，好耐无食过杏仁饼。」我话最好食都系澳门老婆饼，嗱，星期五晚过大海，住下酒店，再玩一个周末，好唔好？
《星岛头条》APP经已推出最新版本，请立即更新，浏览更精彩内容：https://bit.ly/3yLrgYZ
最新回应