李辰安 - 光棍遇着機械人｜辰來之筆

是日天氣，潮濕。幾日前又冷又熱，有時有霧，不過，喜見百般挑戰之下，香港馬拉松圓滿成功，又一次見證我們是活力之都。

我其實考慮過一陣，不時去中環酒館相聚，飲酒吹水，是否不符合一個高尚的香港人本分。「安仔，你唔好喺度無病呻吟，兼夾語無倫次，雖知你會影響其他人之歡樂時光，難得大家做完成個禮拜之長命工作，休息好應該，你唔想飲酒，可以飲咖啡，或者飲礦泉水。」張翁話，近日天氣變化，日日不同，好容易令人感冒，佢問我係咪發燒，我心諗︰講呢啲。
 

香港興起跑馬拉松熱潮。

機械人通過超級電腦幫助運算，能夠變成口甜舌滑之大情人。

機械人可以模擬個別人士聲音。

機械人可模擬人類外貌。

展望將來，機械人可取代人類某些工作。

人在中環有「運動壓力」

「其實我係有感而發，你睇發哥，六十七歲跑完馬拉松都可以如此從容出鏡，同大家講幾句，我後生佢咁多，點解我唔去參加馬拉松？」銀行偉話，人在中環好容易有「運動壓力」，銀行上上下下、左左右右之同事都帶埋運動衫、跑鞋返工，包括日日着3吋高跟鞋返工之秘書小姐，風雨不改跑上半山，再落返嚟，然後先至去健身俱樂部健身，公司過半人都話會參加馬拉松，除咗佢之外。「我當時都覺得有需要去跑步，不過，諗通咗，我都係繼續自己生活方式，我朝朝耍半個鐘頭太極，不時練下八段綿，感覺良好。」

大師兄話︰「高尚之香港人就係好似銀行偉咁，唔好一窩蜂，定啲，你唔夠定噃。講時講，發哥應該擔當香港活力形象大使，宣傳香港之餘，都要鼓勵後生仔動起來。不過，你唔後生，所以唔使理你。」大師兄，乜你又有跑山咩，唔覺眼啫，五十步笑百步，或者根本係一百步笑八十步，我平時食完晏會漫步十五分鐘先至返Office，你呢？當然，我無講出口，費事大家嘈交，於是叫杯馬天尼，望出去欣賞下中環街景，咦，又見有人跑步而過，都係洋人，嘩，身材高度成個發哥咁，真係有型。呢啲就係中環上等人之代表，唔係因為佢係洋人，而係佢有Heart、有力、有恆心。

「世侄，想跑馬拉松要有決心，不過都唔係太難，我有個老友，大過發哥少少，佢由跑半公里開始，依家可以完成半馬。」呢位朋友仲Po咗張當日跑馬拉松照出臉書，張翁話幾乎唔認得係佢，因為成個人Fit晒，原本係圓碌碌，依家好似小生咁款，笑笑口，好似後面仲有一兩個紅顏知己，一齊拍住上。

我諗下，如果我下個禮拜開始跑步，以明年參加馬拉松半馬為目標，唔知會唔會變成朝偉咁瀟洒，如果係，我馬上去買對跑鞋，由半公里開始練習。
 

口甜舌滑伴侶聊天工具
 

銀行偉又學我飲馬天尼，佢話︰「你又使乜羨慕偉仔？依家想變大情人好容易，使乜跑山咁辛苦？」大家馬上好興致想聽下有乜方法，原來又係講AI機械人聊天軟件。

「依家有伴侶聊天工具，機械人由於通過超級電腦幫助運算，好快由一個笨小孩，變成口甜舌滑之大情人，因為佢會識得如何應對女人的心。」幾得意，聽講AI機械人可以模擬個別人士聲音，包括成把情人咁聲都無難度。我用佢寫愛情段子，搵佢代答網上紅顏知己，咁咪得囉。

「安仔，網上世界難分真假，你遇上對方係男人點算？」銀行偉再補充，好大機會對方都係AI機械人。張翁幫大家總結︰「呢啲咪叫做光棍遇着無皮柴，睇粵語長片睇得多。」

喂，大家唔好吹水，不如諗下幾時返大灣區，睇下樓，食下家鄉菜，人生一樂也。大家傾下先。