李辰安 - 光棍遇着机械人｜辰来之笔

是日天气，潮湿。几日前又冷又热，有时有雾，不过，喜见百般挑战之下，香港马拉松圆满成功，又一次见证我们是活力之都。

我其实考虑过一阵，不时去中环酒馆相聚，饮酒吹水，是否不符合一个高尚的香港人本分。「安仔，你唔好喺度无病呻吟，兼夹语无伦次，虽知你会影响其他人之欢乐时光，难得大家做完成个礼拜之长命工作，休息好应该，你唔想饮酒，可以饮咖啡，或者饮矿泉水。」张翁话，近日天气变化，日日不同，好容易令人感冒，佢问我系咪发烧，我心谂︰讲呢啲。
 

香港兴起跑马拉松热潮。

机械人通过超级电脑帮助运算，能够变成口甜舌滑之大情人。

机械人可以模拟个别人士声音。

机械人可模拟人类外貌。

展望将来，机械人可取代人类某些工作。

人在中环有「运动压力」

「其实我系有感而发，你睇发哥，六十七岁跑完马拉松都可以如此从容出镜，同大家讲几句，我后生佢咁多，点解我唔去参加马拉松？」银行伟话，人在中环好容易有「运动压力」，银行上上下下、左左右右之同事都带埋运动衫、跑鞋返工，包括日日着3寸高跟鞋返工之秘书小姐，风雨不改跑上半山，再落返嚟，然后先至去健身俱乐部健身，公司过半人都话会参加马拉松，除咗佢之外。「我当时都觉得有需要去跑步，不过，谂通咗，我都系继续自己生活方式，我朝朝耍半个钟头太极，不时练下八段绵，感觉良好。」

大师兄话︰「高尚之香港人就系好似银行伟咁，唔好一窝蜂，定啲，你唔够定噃。讲时讲，发哥应该担当香港活力形象大使，宣传香港之馀，都要鼓励后生仔动起来。不过，你唔后生，所以唔使理你。」大师兄，乜你又有跑山咩，唔觉眼啫，五十步笑百步，或者根本系一百步笑八十步，我平时食完晏会漫步十五分钟先至返Office，你呢？当然，我无讲出口，费事大家嘈交，于是叫杯马天尼，望出去欣赏下中环街景，咦，又见有人跑步而过，都系洋人，哗，身材高度成个发哥咁，真系有型。呢啲就系中环上等人之代表，唔系因为佢系洋人，而系佢有Heart、有力、有恒心。

「世侄，想跑马拉松要有决心，不过都唔系太难，我有个老友，大过发哥少少，佢由跑半公里开始，依家可以完成半马。」呢位朋友仲Po咗张当日跑马拉松照出脸书，张翁话几乎唔认得系佢，因为成个人Fit晒，原本系圆碌碌，依家好似小生咁款，笑笑口，好似后面仲有一两个红颜知己，一齐拍住上。

我谂下，如果我下个礼拜开始跑步，以明年参加马拉松半马为目标，唔知会唔会变成朝伟咁潇洒，如果系，我马上去买对跑鞋，由半公里开始练习。
 

口甜舌滑伴侣聊天工具
 

银行伟又学我饮马天尼，佢话︰「你又使乜羡慕伟仔？依家想变大情人好容易，使乜跑山咁辛苦？」大家马上好兴致想听下有乜方法，原来又系讲AI机械人聊天软件。

「依家有伴侣聊天工具，机械人由于通过超级电脑帮助运算，好快由一个笨小孩，变成口甜舌滑之大情人，因为佢会识得如何应对女人的心。」几得意，听讲AI机械人可以模拟个别人士声音，包括成把情人咁声都无难度。我用佢写爱情段子，搵佢代答网上红颜知己，咁咪得罗。

「安仔，网上世界难分真假，你遇上对方系男人点算？」银行伟再补充，好大机会对方都系AI机械人。张翁帮大家总结︰「呢啲咪叫做光棍遇着无皮柴，睇粤语长片睇得多。」

喂，大家唔好吹水，不如谂下几时返大湾区，睇下楼，食下家乡菜，人生一乐也。大家倾下先。