辰來之筆｜仲寫網絡小說 拍視頻啦

最近發現網上短視頻好有前途，內地捧紅不少人，從美少女到阿叔都有市場，仲寫乜鬼網絡小說。

「我係咪好Out呢？原來網絡世界係咁大，已經發展到人人可以做導演，人人可以做明星之階段，踎喺間房做鍵盤俠，真係浪費青春。」銀行偉行過嚟潤我一句︰「辰哥，你仲有青春咩？我即係話你呢個年紀應該講智慧，嗱，青春係消耗揮發嘅，智慧係累積嘅，青春是代表一種跌值嘅東西，智慧就係升值。」銀行偉，你都幾好口才，不如去玩《抖音》啦，你成個中環金融才俊咁款，內地好似無你呢類人才，你執靚仔些少，我同你執機錄影，你日日過嚟呢個中環小館，齋噏幾句爛Gag，好似你頭先講青春同智慧之分別，幾好呀，有時講下股、講下樓、講下基金都得㗎。

大師兄原來係內地製作短視頻粉絲，一聽就知我講乜，佢話︰「係噃，有位內地朋友專門扮深圳搵銀一族，造型成個《少林足球》三師兄田啟文咁，騰騰雞雞，成日好似話︰我唔得閒同你講呀，幾個客等緊我，仲要睇住個市，秒秒鐘幾十萬上落吖嘛，喂o依家咩嘢價？哈哈，偉哥你做個中環三師兄系列，包你紅到去大灣區。」

銀行偉畀大師兄耍咗一輪，都唔知點樣反應，唉，佢係中環人，主要睇「油管」視頻，聽英文嗰類，又點知內地有一個短視頻潮流。「大家不如飲杯威士忌，慢慢講！」張翁話，內地短視頻紅人，閒閒地一兩百萬人仔收入一年，佢都有留意，所以大家都可以講得埋欄，銀行偉就行咗過去搵靚仔侍應碧咸仔吹水講波經，費事睬我哋。

短視頻之所以受歡迎，因為大家時間有限，o依家除咗阿公阿婆坐定定睇電視劇之外，個個人手一機周圍去，𥄫住手機注意力也不過最多分半鐘，所以要有新媒體取代傳統資訊，咁先至可以吸到注意力，吸到流量。「以前大家最快速之娛樂係睇四格漫畫，最多六格，好似《老夫子》（見圖）就係經典。」張翁後生都係漫畫迷，去美國留學要屋企人空運過去畀佢，否則好難過日子。

自從二十年之前有手機，首先係2G文字傳輸，呢個變革力唔算好大，個手機屏幕又細，速度又慢，無人會用手機睇報章、雜誌，吓哇！去到3G、4G就已經有畫有聲有電影，最Power都係有咗社交平台，大件事啦，成個世界都唔同。

銀行偉行返過嚟，佢話碧咸仔都好想搞搞新意思，拍下短視頻做網紅，問大家有無路數。「大哥，呢個係網絡世界，有乜路數？仲要靠人際關係，自己上網研究咪得囉！」我同碧咸仔介紹內地短視頻就好似一個數字化之漫畫，你唔使識畫公仔，因為你要出鏡扮老夫子，即席演出幾十秒有故事、有笑位，又有風格之視頻，然後放上網，你可以同平台分佣金，紅咗之後，可能有人搵你拍植入式廣告。

「哥仔，你唔好諗住以前咁Chok住個樣做網紅，你要有創意在鏡頭前做到一個獨特有風格之角色，明未？」銀行偉問︰「不如大家合作，搞一個中環小酒館小品系列，嗱，張翁就最好扮低調金融大俠，專門踢爆行內鬼馬事件。」張翁話，內地有個好出位之「斤叔」短視頻角色，非常成功將廣州富豪之特色風格發揮出來。「例如佢係腳踢人字拖，夏天牛記笠記，一個大秤砣不離身。」銀行偉問個秤砣有乜Function？「嗱，人家塑造角色係有一手，單係着人字拖都未足以突出廣州土豪之形象，拎埋個秤砣形象就出啦。」

好啦，威士忌愈飲愈好味，事關大家有話題。大師兄幫我解畫︰「斤叔成日行去買樓買車位，佢老人家講價唔係講幾多銀，而係講幾多斤錢，個秤係用嚟秤錢。」土豪買樓斷斤秤，誇張之餘，亦加強角色形象。當然，廣州無土豪會用斤計銀紙，但大家可以投入呢個角色，因為斤叔唔使做，有三幾棟住宅大廈、一百幾十個車位收租，如是者，關於廣州土豪之故事就可以順利展開。

香港富豪又有乜特色？大家當然請教張翁，佢話︰「廣州土豪用斤秤銀紙，誇張，你又知唔知香港真係超級富豪唔會用電腦，計數機都可免。佢係用算盤，一、二百億Deal都係用算盤度出嚟。」明，以後搵張翁拍中環富豪系列，造型係西裝革履，戴墨鏡，同時一定拎住個算盤。

好啦，有張翁做主角就掂，其他好辦事，我哋其他人等做跟班、擦鞋仔，一於咁話，大家飲杯。