辰来之笔｜仲写网络小说 拍视频啦

最近发现网上短视频好有前途，内地捧红不少人，从美少女到阿叔都有市场，仲写乜鬼网络小说。

「我系咪好Out呢？原来网络世界系咁大，已经发展到人人可以做导演，人人可以做明星之阶段，踎喺间房做键盘侠，真系浪费青春。」银行伟行过嚟润我一句︰「辰哥，你仲有青春咩？我即系话你呢个年纪应该讲智慧，嗱，青春系消耗挥发嘅，智慧系累积嘅，青春是代表一种跌值嘅东西，智慧就系升值。」银行伟，你都几好口才，不如去玩《抖音》啦，你成个中环金融才俊咁款，内地好似无你呢类人才，你执靓仔些少，我同你执机录影，你日日过嚟呢个中环小馆，斋噏几句烂Gag，好似你头先讲青春同智慧之分别，几好呀，有时讲下股、讲下楼、讲下基金都得㗎。

大师兄原来系内地制作短视频粉丝，一听就知我讲乜，佢话︰「系噃，有位内地朋友专门扮深圳搵银一族，造型成个《少林足球》三师兄田启文咁，腾腾鸡鸡，成日好似话︰我唔得闲同你讲呀，几个客等紧我，仲要睇住个市，秒秒钟几十万上落吖嘛，喂o依家咩嘢价？哈哈，伟哥你做个中环三师兄系列，包你红到去大湾区。」

银行伟畀大师兄耍咗一轮，都唔知点样反应，唉，佢系中环人，主要睇「油管」视频，听英文嗰类，又点知内地有一个短视频潮流。「大家不如饮杯威士忌，慢慢讲！」张翁话，内地短视频红人，闲闲地一两百万人仔收入一年，佢都有留意，所以大家都可以讲得埋栏，银行伟就行咗过去搵靓仔侍应碧咸仔吹水讲波经，费事睬我哋。

短视频之所以受欢迎，因为大家时间有限，o依家除咗阿公阿婆坐定定睇电视剧之外，个个人手一机周围去，𥄫住手机注意力也不过最多分半钟，所以要有新媒体取代传统资讯，咁先至可以吸到注意力，吸到流量。「以前大家最快速之娱乐系睇四格漫画，最多六格，好似《老夫子》（见图）就系经典。」张翁后生都系漫画迷，去美国留学要屋企人空运过去畀佢，否则好难过日子。

自从二十年之前有手机，首先系2G文字传输，呢个变革力唔算好大，个手机屏幕又细，速度又慢，无人会用手机睇报章、杂志，吓哇！去到3G、4G就已经有画有声有电影，最Power都系有咗社交平台，大件事啦，成个世界都唔同。

银行伟行返过嚟，佢话碧咸仔都好想搞搞新意思，拍下短视频做网红，问大家有无路数。「大哥，呢个系网络世界，有乜路数？仲要靠人际关系，自己上网研究咪得罗！」我同碧咸仔介绍内地短视频就好似一个数字化之漫画，你唔使识画公仔，因为你要出镜扮老夫子，即席演出几十秒有故事、有笑位，又有风格之视频，然后放上网，你可以同平台分佣金，红咗之后，可能有人搵你拍植入式广告。

「哥仔，你唔好谂住以前咁Chok住个样做网红，你要有创意在镜头前做到一个独特有风格之角色，明未？」银行伟问︰「不如大家合作，搞一个中环小酒馆小品系列，嗱，张翁就最好扮低调金融大侠，专门踢爆行内鬼马事件。」张翁话，内地有个好出位之「斤叔」短视频角色，非常成功将广州富豪之特色风格发挥出来。「例如佢系脚踢人字拖，夏天牛记笠记，一个大秤砣不离身。」银行伟问个秤砣有乜Function？「嗱，人家塑造角色系有一手，单系着人字拖都未足以突出广州土豪之形象，拎埋个秤砣形象就出啦。」

好啦，威士忌愈饮愈好味，事关大家有话题。大师兄帮我解画︰「斤叔成日行去买楼买车位，佢老人家讲价唔系讲几多银，而系讲几多斤钱，个秤系用嚟秤钱。」土豪买楼断斤秤，夸张之馀，亦加强角色形象。当然，广州无土豪会用斤计银纸，但大家可以投入呢个角色，因为斤叔唔使做，有三几栋住宅大厦、一百几十个车位收租，如是者，关于广州土豪之故事就可以顺利展开。

香港富豪又有乜特色？大家当然请教张翁，佢话︰「广州土豪用斤秤银纸，夸张，你又知唔知香港真系超级富豪唔会用电脑，计数机都可免。佢系用算盘，一、二百亿Deal都系用算盘度出嚟。」明，以后搵张翁拍中环富豪系列，造型系西装革履，戴墨镜，同时一定拎住个算盘。

好啦，有张翁做主角就掂，其他好办事，我哋其他人等做跟班、擦鞋仔，一于咁话，大家饮杯。