星岛日报

澳门有几好,你话嘞

2020-09-08 00:00
  小时候听到大人见面打招呼,临尾加一句︰「得闲同你饮茶食饭再倾」,真系好假,你话吓哇! 
  今日如果我话「得闲同你饮茶」,你可能真情流露,回应一句:「出年都未必得噃。」真的,新冠疫情流行到家阵,病毒无退减迹象,社会无有效对策,睇见澳门可以返内地,我感觉又一次被人冒犯了。
  今日有啲燥火,家中办公办到眼蒙蒙,日日自律在家中食打风餸,乜都话上网同你Zoom,大佬,好闷好闷,就嚟爆啦。「安仔,你爆还爆,做乜对澳门咁不满呢?」我其实刚刚特登唔WhatsApp大师兄,打个电话同佢亲自倾几句,咁先有番人气,约佢得闲饮茶之馀,顺便呻几句。
  「师兄,你话呢个世界几唔公平,澳门早几年GDP过香港头,兼且年年派钱,真系搞到我同特首、财爷好无面。」大师兄即时打断我话︰「你同特首、财爷嘅共通点,大家都系香港人,你唔好乱咁将自己升呢。」乜都好啦,呢几年听咗唔少闲言闲语,话澳门叻过香港,包括住宅楼价,呢啖气未消化得过去,今次又畀澳门攞彩。「有无搞错,梳打埠真系识得消毒咩?咁快唔使隔离。」大师兄好似拎起份报章咁读畀我听︰凡于十四天内没外国或境外旅居史的澳门居民,持有七天内核酸检测阴性证明或七天内具有检测讯息健康码,在内地各地免除隔离十四天。
  「安仔,要有检测证明至得,你估直行直过自由行?之不过,香港暂时无此安排啫。其实你又唔好咁小器,澳门豆腐膶咁大,经济单一化,无内地旅客关照,好惨㗎,你估系香港国际金融大都会咩!」咁都啱听少少,不过,你好似间接话阿爷疑似偏心呢个梳打埠咁话罗噃?「无咁嘅事,你唔好乱噏。你话饮茶几时都得,o依家可以两人同坐,你约埋张翁、银行伟都仲可以,坐隔篱都OK,习惯下就唔觉得见外啦!」吓,有乜好饮呢?两个两个分开坐,你估民初时代去同二奶相睇?抑或好似日治时代,大家系地下组织人士,密会交换情报?不如悭番好过。
  大师兄坚持叫我打电话约下张翁先,我拨通电话问张翁几时得闲大家饮餐茶。「安仔,乜咁有心,呢句说话我无听几十年,得闲饮餐茶,代表讲咗无讲之敷衍说话,不过奇怪在由你开口讲,喺咪o依家潮流新兴之社交言语?」我唯有一五一十将成件事向德高望重之张翁重新复述解释一次,讲开又讲,我同张翁呻多一次,我哋香港又畀隔篱埠攞彩之事。
  「世侄,香港同澳门又点可相提并论呢?」愿闻其详,前辈。「澳门得嗰几十万人,真系世界真细小,就好似你当年喺乡下大学寄宿,一间房上下铺先得最多六个人,有事梗系易话围,人哋系顺哥顺嫂,无论检测抑或封城都OK,所以咪快快趣趣大家自由行罗。」咁香港又系乜嘢环境?「一部《红楼梦》咁长篇,人情世故复杂过贾府大观园,你话会点呢?」

男儿志在四方

  即系话,如果当年大观园有人确诊,咁就好大件事,分分钟官府都无符,吓哇?「讲多无谓,再讲湿滞,你两师兄咁有雅兴,我唔好意思托你手踭,不如明天午饭,你两位过嚟我去开嗰家中环茶居,我订两枱,留姓张,我等阵去约银行伟。」张翁话好耐无过澳门,犹记得佢后生之时,好锺意几个年轻人约定星期五晚搭大船去澳门之美好时光。
  「你去买大细,定系廿一点?」张翁笑笑口,话︰「成个礼拜都喺中环股票市场搏杀,仲赌唔够咩?去到澳门梗系Relax下啦,几十年前之澳门好奇妙,由香港过去,好似时间慢咗一倍,无人行路急急脚,Hea到飞起。」系罗,咁都会发达嘅?仲会年年派钱,阿爷又咁关照。
  「我有个阿叔喺大马路开药房,在当地已经系大生意,佢老人家属于富豪级数,间屋大到你唔信,我不知几羡慕阿叔,行行企企无操劳,生意稳定,夥计又听教听话,好过收租。去到澳门一定招呼我成班后生仔食翅,蟹季之时,必定食黄油蟹,简直系世外桃源。」
  香港就辛苦好多,张翁话,早知后生就去澳门发展,求其开家药房都可以食好、着好、住得好。之不过,男儿志在四方,香港系国际金融大都会,呢度嘅生活同经历先至刺激。「系罗,唔通我二十几岁去到澳门,食鸡鲍翅,食到o依家咩!」
  好嘞,张翁,大家讲住咁多先,饮茶嗰阵时再讲下你在澳门之逸事,例如有无识到澳门女朋友,明天见。

文:李辰安 图:中新社
李辰安,从事创作二十年,开拓城市感觉派文风,与读者一起怀旧,穿越香港时空找寻生活新旨情。

最新回应

相關新聞

热门文章