買樓靠父母　23歲Ernest睇中靚盤：450萬好平呀！

TVB話題節目《有樓萬事足》，播到第3集，訪問到一位年僅23歲、大學建築系畢業無耐嘅後生仔Ernest。已成功做業主，放租出去畀人幫手供樓嘅Ernest，相比「105%姐」Macy、「50蚊哥」嘅經歷，明顯輕鬆得多。上車靠父母嘅佢喺節目中分享：「有日行過地產鋪，層樓450萬，好平呀！即刻打畀媽咪，佢問我夠唔夠錢，使唔使寫支票。」有父母幫手畀首期，Ernest買咗個港島區藍籌屋苑兩房單位。 葡萄Ernest時，Ernest亦講返自己媽媽都係努力做嘢儲錢先捱到今時今日，佢仲話：「其實唔洗去羨慕邊個，人哋會諗『你開心啦，有樓』，你話樓價高，都要儲錢㗎。」 另一位28歲嘅Roy，雖然都有阿媽筆退休金幫手畀首期，不過靠自己供樓嘅佢，似乎冇Ernest生活得咁輕鬆。放棄萬幾蚊寫字樓工，Roy毅然轉行做紮鐵，日日身水身汗，返工畀人「問候」，曬到甩皮，都係想為家人置個安樂蝸。