星8卦丨「细细粒」为帮「大大只」求财求子迫全家人食斋搞到阿仔心脏出事仍未知死

2023-06-06 10:00

命里有时终须有，强求得来有时未必是好事。讲紧嘅系「大大只」同「细粒粒」两公婆，佢哋两个细细个结婚，成日贪恋二人世界，又唔知点解突然想生仔，虽然好努力，但因为年纪大所以无乜效果，「细细粒」一向都迷信，又好相信命理，问咗好多坊间求子嘅秘方，乜神都拜过，好唔容易生到个仔，但呢次生仔过程几乎搞到佢一命呜呼。

高人叫「细细粒」要食素，连带迫埋「大大只」一齐食，仲要连未满月嘅仔都开始戒埋肉。高人仲话一家人齐心仲可以追多个女，凑成好字。「细粒粒」知道「大大只」一直希望生女先，所以好决心叫一家人配合，仲拎「大大只」搵嘅钱捐咗一半去做善事，好彩系愈捐愈有，令「细细粒」觉得高人有料到。

话咁快已经过咗可以生仔嘅年纪，「大大只」有叫老婆唔驶咁认真，不如由得阿仔食番肉，毕竟系惊阿仔太细个，身体唔适应，出咗问题就害死阿仔。最近真系畀「大大只」讲中，阿仔成日都好攰，又嗌心脏唔舒服，「细粒粒」即刻带佢睇医生，原来系因为长期食素出事，唔适合食素，最好即刻食番多啲肉。但「细粒粒」即刻好大反应，话阿仔唔茹素会影响家运，情愿食多啲补充剂，「大大只」同老婆嘈咗N次，但都说服唔到佢，所以呢排人前人后苦瓜乾，有苦自己知。