星8卦丨「好命妹」为老爷面子延迟再婚积福愈嫁愈好

2023-05-19 11:00

既然做得令全城女人都羡慕嘅「好命妹」，行呢个晚运的确系做咗十世好事至有咁嘅命水。嫁第一次嘅「好命妹」唔系好开心，但以一个乜都唔识嘅靓妹，嫁入咁大个门口又真系好诱惑，加埋老豆系咁话呢个门口好，唔嫁就笨。

嫁入去又点啫，有钱人唔见得濶佬，外家一啲都唔可以靠「好命妹」帮到屋企生意，反而因为普通人家畀老公睇唔起，有钱仔多女人埋身系日常，「好命妹」所以做咗生仔机器嚟自保。因为「好命妹」脾性好，竟然系家族场合遇到「有为」，虽然使君有妇，但「有为」话明会为「好命妹」发奋上进，要做个有钱人，果然用咗10几年时间成为城中才俊。

同时「有为」仲同老婆摊牌话要几多钱都得，但求回复自由身，搞咗几年「有为」终于如愿以偿，点知喺呢个时候「好命妹」同佢讲一定要等多一啲时间，为咗大家面子唔可以任意妄为。结果等到老人家寿终正寝，两个人至可以大大方方公开关系，而且半年唔够就低调结埋婚，似乎「有为」下半生嘅努力都系想娶呢个女人，而且婚后人前人后真恩爱，最近仲将自己副身家同老婆两份分，「好命妹」完全无谂过，难怪愈来愈风骚。