星8卦｜「王子」恶死横行 对住父母超级孝顺 娶老婆首要两老Like

人不可以貌相，咪以为「王子」个性冷淡，去到边都系怕丑仔，但自从跟咗「M君」之后，身家厚好多之馀，亦成为业界有势力人士。

「王子」出身真系麻麻，老豆同阿哥都恶死到系人都怕咗佢哋，楼上楼下未俾三父子闹过，最恐怖系齐心出手，打遍自己住嗰区，后嚟「王子」做咗知名人士，自然唔敢太放肆，要顾下公众形象。

「王子」无论几成功，对于屋企佢真系好尽心尽力，尤其锡阿爸阿妈锡到燶。咁多年「王子」妈都希望见到乖仔娶老婆生个孙俾自己抱，点知佢就好似浪子咁年年换女友，仲要愈换愈后生，依家嗰位细王子20年，「王子」妈唯有安慰自己可以有排生。「王子」对佢啲女人一向好照顾，初恋女友到依家仲俾生活费，有情有义。唔单止咁，佢生命中最重视系屋企人，自细都同老人家一齐住，今日有名有利，都要自己嘅女人明白呢点，之前有位模特儿咁靓嘅「姐姐仔」，王子一心都谂住娶入门氹下老人家开心，点知「姐姐仔」死都唔肯同两位长辈住，话唔惯屋企有外人，「王子」咪二话不说叫姐姐仔死开。

不过后嚟「王子」都唔敢搏，决定买埋隔离个单位，分两个门口出入，但一有时间就叫阿妈煮饭，啲女人唔锺意都可以收埋系另一间屋，因为几千尺，唔怕无空间吖嘛。

【相关文章】：

星8卦｜「白鸽」嫁入豪门劲刻薄 工人日日自备乾粮开餐 月薪7万冇人肯做

星8卦｜「巴辣」用钱纵坏女儿变港孩 老窦地位低冇Say宁愿做鹌鹑

星8卦｜「潮女」悭家换「长辈级」形象指导 为细路唔介意成身土味

《星岛头条》APP经已推出最新版本，请立即更新，浏览更精彩内容：https://bit.ly/3yLrgYZ