星8卦｜「尊嫂」山鸡变凤凰做阔太 附属咭碌爆额瘀到爆
2023-01-17 11:30 
女人最大成就当然系嫁个有钱人，嫁唔到都希望嫁个知名人士，满足吓虚荣心。
「细粒妹」向来做惯外卖，几远都送，一次常规开工竟然俾「阿尊」𥄫 中，初时「细粒妹」唔多识「阿尊」系边位，但送得几次外卖，见对方靓仔住得又富贵，虽然贴士唔多，胜在系熟客，又唔太难招呼，如是者外卖咗成年。
最抵死有次唔知点解两个人出街食饭被断正，由屋企开始就被狗仔跟足全程，论背景身份「细粒妹」真系无可能，但当时「阿尊」妈咪身体一直麻麻，几个仔无个肯成家立室，向来孝顺嘅「阿尊」把心一横，实行自己踢爆同「细粒妹」系恋人关系，而且定埋婚期系半年后。
「细粒妹」点谂？无所谓啦，自己又唔系出身矜贵，可以嫁知名人士，直情光宗耀祖啦，加埋尊妈成日话「细粒妹」靓女后生有福气，最好婚后三年抱两，继后香灯。「细粒妹」以为「阿尊」行头劲又住得富贵，做佢老婆唔会太刻薄，而且一直都有工作，人气唔错，加埋老本成屋人都可以过啲好日子。
弊在婚后先知「阿尊」有不良嗜好，成日搏杀到唔知天昏地暗，阿妈闹都当耳边风，所以家用都俾得手紧，早排外父想搵女婿支持下置业都无表示，「细粒妹」真系有啲嬲。为哄番老婆，「阿尊」即刻出咗张附属咭俾佢话任签，「细粒妹」觉得总算等到出头天，终于可以有私己钱用吓买吓。
有咭唔用点对得住班姊妹，「细粒妹」叫晒班同行出嚟，毕竟佢系最风光嘅一个。成班女人喺高级餐厅饮饱食醉之后，「细粒妹」谂住去买个恨咗好耐嘅名牌手袋，仲有一件大褛，条数加埋都未够10万，找数时店员好尴尬咁同「细粒妹」讲话超额碌唔到，最瘀系大家都知「细粒妹」老公系边位，店员叫佢一系买袋一系买褛，成班姊妹望住「细粒妹」嘅耻笑眼神，佢呢世都应该唔会忘记，劲在佢返屋企粒声唔出，因为佢心谂，「阿尊」一定比自己早死，只要唔离婚，自己最后都系大赢家。
【相关文章】：
最新回应