星8卦｜串嘴「四家姐」得罪全行后台冧档靠黏老板嫂 得罪老板等收皮
2023-02-07 10:00 
成日都话做人唔好有风驶尽𢃇，尤其一啲以为自己埋到好码头就巴巴闭嘅短视小三。
「四家姐」想当日靠乡土味跟住「伪老细」串过码头咕哩，由Reception到监制都统统得罪晒，以为自己系新欢，万千宠爱任何人都要迁就，明明啲演技烂到一个点，但依然成日做主角。
有名你叫「伪老细」，唔驶几耐金主失势，连大权都无埋，「四家姐」平时周围惹火头，无咗靠山大家仲唔一沉百踩，贱过地底泥。好彩佢平时最叻擦鞋，一直凑住「老板嫂」，两个人恐龙时期合作过做两姊妹，话晒「老板嫂」系一姐，多年嚟就算洗尽铅华，「四家姐」都无放弃定期送上门打招呼，目标梗系佢背后嘅「老板」老公。
公仔箱无运行，佢即刻捉实「老板嫂」只脚，希望「老板」畀啲工作机会，终于枕头状有效，「老板」天皇预埋「四家姐」一份。可惜佢死性不改，都未开工，就周围放料，激到「老板」生虾咁跳。但「老板」无佢符，系因为「四家姐」对无利用价值嘅人天生一对狗眼，但如果有机会帮自己上位嘅，连身边嘅助手甚至工人都低声下气扮好人，又或者扮凄凉博同情。不过今次又再乱放料，已经俾「老板」炳咗一镬，叫佢收声，否则下一步就收皮！
【相关文章】：
星8卦｜模范夫妻爆离婚！小云出轨发姣派帽 吉仔用成副身家箍煲
《星岛头条》APP经已推出最新版本，请立即更新，浏览更精彩内容：https://bit.ly/3yLrgYZ
關鍵字
最新回应