古天后日志｜港股千点上落足以玩死散户

9月1日，部份时间有阳光，有几阵骤雨及雷暴，日间局部地区雨势较大，天气炎热。美股仲未识反弹，隔晚三大指数下跌，道指跌280点；标指跟纳指分别跌31点及66点。总结喺8月份，美股三大指数皆跌逾4%。

其实已经一段时间，联储局嘅唔少官员都系立场偏鹰，只系之前美股充斥过份乐观情绪，市场漠视官员嘅鹰派言论。不过上周五鲍爷喺Jackson Hole年会上再次放鹰，一盘冷水向住美国投资者照头淋，令市场资金唔敢再放肆risk on。实际上美国经济仍有下调压力，加上面对高通胀，联储局两害取其轻，鲍爷都讲到明为咗要控制通胀，加息带嚟嘅短暂痛苦系难免。

恒指料19200至20200上落

隔晚公布小非农数据，连续两个月偏软，新增职位只有13.2万份，较上月的27万份大幅减少。之前已有唔少企业表明停止招聘，甚至要裁员，呢个数字都预咗唔会好得去边，未来非农数字有机会进一步受压。喺新增职位减少同时，薪金喺高通胀下则维持高水平，企业面对如此状况，即使用少咗人，人工成本都好难有得减，经营环境恶劣，营运能力较弱嘅中小型企业，有机会被淘汰。不过向来大小非农难免有差，等埋周五嘅大非农数字，系咪一样偏软。

港股仍然系日升日跌，甚至系上下半场升跌有异，噚日早段港股裂口低开，但成交继续薄弱，虽然噚日大市喺19500水平似有支持回弹，全日成交更增至1365亿元，但噚日系MSCI调整，并唔系真正成交增加配合反弹，千祈咪兴奋得太早，今日成交随时又打回原形。港股暂时无大方向，就喺19200至20200之间上落，多人睇淡大户就挟淡仓，挟到咁上下又玩回马枪，虽然波幅只有一千点，但单日又上又落，已够玩死炒指数嘅散户。由于股票难炒，唔少散户转向炒指数搵食，只不过喺成交薄弱下，大户要操控指数更加得心应手，散户搵食只有更艰难。

古天后

(徐狄怡，证监会持牌人)