古天后日志｜港股打风前夕偏软少做少错

8月24日，初时大致天晴，但有烟霞，局部地区有骤雨及雷暴，日间天气酷热。台风逼近，天气于晚间稍后时间料转差。隔晚美股连续第三晚下跌，市场等待Jackson Hole央行会议。美国8月份制造业PMI初值由52.2下跌至51.3的两年低位，并差过预期51.8。投资者关注显示美国经济放缓数据，以及观望鲍爷喺央行年会放会再放鹰，美股暂时缺乏方向。

留意呢两日虚拟货币走势转弱，反映市场risk on情绪收敛；而油价则反弹，小心通胀因为油价未能搵到个顶，咁联储局讲到明，控制通胀喺首要任务，若然通胀再度走高，届时联储局不得不加大收水力度。

至于港股则跌至19500水平，目前于呢水平争持，19500水平系5月低位，其后港股喺6月份半年结反弹，可惜至7月无以为继，嚟到8月更加系水尽鹅飞，成交萎缩下，港股有阴乾之势，19500实在不容有失。

京东(09618)业绩好过预期，虽然内地喺疫情反覆下，再度于各地封城，但集团第2季度营收仍有5.4%增长，non-GAAP盈利更达65亿元，增长41%。留意京东喺230元水平阻力唔细，小心今日高开低走。

有机会下试19000关

困扰港股嘅又何止系缺水问题，空军长期扎行马沽空，唔少股份嘅沽空比例每日都超过三成，一旦市场嘅买盘缩一缩，被沽空嘅股份好容易喺成交薄弱下，无厘头急跌。由于空军长期招呼港股，令到北水都却步，北水虽然任性，但亦非全部系蠢人资金，既然外资长期玩沽空，北水亦无谓硬碰，选择离场，宁愿留返喺A股搵机会。

台风马鞍逼近，有机会喺明日吹到正香港，明日有机会有日打风假期而休市，估计今日市况更趋淡静，但正因为咁，港股有可能偏软，一旦19500失守，唔排除有机会下试19000至19200点，尤其喺19000至19400嘅牛证份量相当够，唔排除呢批牛证有机会阵亡。虽然发行商唔一定要将牛证杀到尽先赚到钱，但当呢批牛证派得七七八八，到价杀埋批证，再发一批新证搵食，再派过出街，发行商要做到货如轮转，咁先系长期赚钱嘅方法。

古天后

(徐狄怡，证监会持牌人)