古天后日志｜北水再撤出港股 港股阴乾下死路一条

8月23日，天晴，日间天气酷热，部份地区有烟霞。早几日古天后讲咗，当美股发展到劣币驱逐良币，重磅一线股已乏上升动力，市场转炒二三四线股，甚至迷因股嘅时候，小心音乐椅游戏嘅音乐随时停落嚟。话口未完，美股承接上周五跌势，隔晚跌势嚟得更急，道指跌643点；标指跟纳指则跌逾2%，分别跌90点及323点。一直强调美股仍处于熊市之中，而熊市嘅特色就系当中嘅反弹力度可以相当惊人，甚至挟到淡友怀疑人生。

被喻为今年美股最准分析师之一嘅美国银行策略师Michael Hartnett认为，美股仍处于熊市之中，可能要到明年先至真正见底。佢表示自1929年以来，标指于43次熊市反弹中平均升幅为17.2%，持续时间为39个交易日。而今次，标指喺41日内涨幅达到17.4%，其实美股已处于反弹区间顶部。

港股阴乾 易跌难升

不过美股急跌，并唔等于今日港股要跟跌，喺噚晚美股脚软之际，反映中概股嘅中国金龙指数走势尚算坚挺，只要ATMJ呢几只重磅科技股仲顶得住，港股可能都系一两百点之内上落，并唔会跟美股出现2%嘅跌幅。但港股市底偏弱，就算唔大跌，今日都好难有乜嘢表现，要睇住19500呢个位守唔守，今个月19500呢个位已考验多次，如果喺下周期指结算前失守，今个月好大机会以低位结算，并再下考验19000至19200水平。

虽然内地噚日已减LPR变相放水，内房股噚日叫做有得反弹，但银根短缺债务问题，仍然未能解决，暂时只系帮到部份财政状况较佳嘅内房顶住先，呢一个内房债务炸弹一日未拆除，呢个板块仍受困扰，港股整体资气氛亦难以逆转。

另一方面，港股低迷嘅成交额，继续令港股偏软，外资一早已拒绝再玩，而北水亦见半放弃状态，近日屡次录得北水净流出，若果连北水都撤底放弃港股，成交持续萎缩，港股就只有阴乾，易跌难升。

古天后

(徐狄怡，证监会持牌人)