古天后日志｜今年最重磅IPO中免未见引起市场兴趣

8月16日，多云，间中有几阵骤雨及雷暴，气温仍然高企，天气闷热。隔晚美股低开高走，道指收市升151点；标指跟纳指分别升16点及80点。喺市场游资仍然充裕下，上升动力仍有，只系成交略见缩减，都要提高警觉。一直推高通胀嘅元凶油价持续走弱，更跌穿92美元横行区底部，有机会确认转势，油价回软，通胀压力大减，10年债息回落至2.77%，呢个系支持美股继续反弹嘅原因。

不过2年跟10年债息仍然倒挂，反映美国经济仍有机会陷入衰退，不过市场偏偏打赌明年联储局唔单止唔再加息，更有几会减息放水，喺目前美股形势大好嘅情况下，联储局似乎就无放水救市需要，一直只系市场一厢情愿嘅睇法。只系美国基金现金水平仍偏高，联储局仍未加码收水，待下月联储局开始缩表，加码至每月950亿美元收紧银根，未知对美股有否负面影响。

港股成交 衰过沙士嗰阵

A股近日表现甚为坚挺，两市成交维持喺9000亿以上，相对港股奀都爆嘅成交，内地股市流动性远胜港股。上月内地M2增长12%，人行展开4000亿元MLF操作，及20亿元公开市场逆回购操作，充分满足金融机构需求。而MLF操作及公开市场逆回购操作嘅中标利率均下降0.1厘，分别为2.75厘及2厘。喺人行放水下，内地股市料有支持。

港股继续乏善可陈，日复日只有七百几亿成交，以目前港股嘅规模，难听啲讲，仲衰过沙士嗰阵。港股喺20000点水平徘徊，老实讲大部份股份估值处于合理甚至抵买水平，但就系无资金肯入场。港股唔上唔落，如老僧入定，买卖两闲。最怕系一直无成交下阴乾。中免准备招股，应该系今年集资额最大IPO，但都要因应市况大减集资额，只系雷声大，雨点小，暂未见市场有太大反应，就连新股都未能引起缸边友兴趣，要怪就怪今年以嚟上市嘅新股，几乎无乜边只有好结果，试问又点引起资金兴趣。

古天后

(徐狄怡，证监会持牌人)