【独家】讲旧史多歌迷全属虚火 许廷铿曾被TVB迫上一线惊到失准

因为担任《全民造星III》评判讲嘢有Point，许廷铿（Alfred）被网民大赞从而吸纳大堆Fans。入行11年，离开TVB三年的Alfred靠自己首夺商台《叱咤》「男歌手」金奖，想当年Alfred曾被TVB捧到上天，讲起旧史，Alfred语重心长：「大树虽然好遮荫，但长期受温室保护，会形成自身有缺憾。」话中有话，金牌评判果然有料到。采访：方骞平 摄影、谭壹致 发型：Derek Li@Xenter 化妆：Khaki Yan 服装：LAKH supply 场地：The Wave

《劲歌总选》日前举行，大部份奖项分晒畀自己人，其中胡鸿钧更连扫5奖，较当年力捧中嘅许廷铿仲要多两个奖。经历过「虚火」阶段，令「长大」咗嘅许廷铿有更深体会，「大树虽然系好遮荫，但长期受温室保护，会形成自身有缺憾，有啲嘢系唔识面对嘅，当你以为自己有好多歌迷，其实你未面对过真正嘅乐迷。呢啲喺入面(TVB)学唔到，而我出咗嚟，经历过呢个阶段，眼见反应大不如前，先发觉呢个就系真实嘅社会！」

离开大台先见真章

许廷铿对自己实力嘅最大怀疑，就系攞奖最多嘅时候：「曾经喺大台嘅音乐颁奖礼得到几个奖项，有几多奖唔系重点，当时我好惊，惊演出水准唔可以食得起呢个奖(最佳演绎男歌星)，后来演出失准，我都嬲自己嬲得几紧要，自此洗心革面，重新认识咩叫唱歌！」提起当年被推上高峰位置，更已落实红馆档期，因为Alfred自觉未准备好而拒绝去做。「就算畀到我，我唔觉得值得嘅话，我都未必会去做，如果我对脚喺台上震紧，我都唔可以征服到呢个舞台啦！」至19年，Alfred先首登红馆开个唱。「所以话，无论大台有乜机会，有几多配套，其实最后都系睇你平时准备功夫有几多，而我由初出道到离开嗰9年都喺同一个环境，对嗰啲曝光同人气习以为常，发现冇咗大台先真系见真章！」

期待跟Manson合作
问到会否将人生经历告诫胡鸿钧？Alfred两度偷笑后说：「佢嘅人生经历都唔少㗎，佢自己知㗎喇！初出道时佢可能冇咁成熟，慢慢同唔同嘅朋友相处，个价值观系会改变。所以我觉得佢搞得掂，系叻仔！由头到尾我对佢都好似细佬，欣宜系我姐姐，佢得到今日嘅成就，作为朋友当然开心。」成为乐坛一线歌手，许廷铿除咗期待跟独立幕后音乐人合作外，都想同《造星III》一班新血喺乐坛一齐玩，尤其锺意Manson(张进翘)的音乐风格及罗凯铃（Judas）的才艺。