【独家】Lokman运滞拜神求安心 姜涛误爆《太平》被劈死结局

姜涛同Lokman（杨乐文）@MIRROR有份参与ViuTV原创剧《太平纹身店》演出，姜涛演黄德斌囝囝，而Lokman就做德斌年青版。提到两人首次演古惑仔，两人都好鬼兴奋，仲大讲劈友难忘戏份，不过姜B竟然愈讲愈high，唔单止讲到德斌因他太重，孭唔起的搞笑情况，更加唔觉意误爆自己惨死一幕。而身为MIRROR队长的Lokman近年似乎工作量不算多，他就解释只因疫情影响令工作经常有阻滞，更自爆有去拜神求个安心。撰文：杜淑霞 摄影：谭壹致 服装：initial Fashion

剧中姜涛跟黄德斌和周秀娜都有不少对手戏，面对型男和女神他承认有压力，「当初知道系佢哋后，我本身拍戏经验唔多，所以去到（现场）都唔够胆出声，好彩两位都好肯教我，娜姐比较倾偈倾得多啲，德斌前辈就问佢之前拍戏嘅经验。」他承认因德斌比较cool，搞到他最初有啲惊，「佢本身又好大只嘅一个人，跟住呢把声又沉，又贴住须喎！造型好猛，真系倾落去唔系咁样，好随和。」


讲到角色，姜Ｂ更加雀跃，因为有机会初尝劈友，「我九成嘅戏系鬼角色中度过，唯一一个做人嗰场戏，人生第一次打戏，嗰日好好玩，由细到大都好锺意睇古惑仔嗰啲戏。（当自己浩南？）冇冇冇，纯粹觉得好好玩，有武术指导即场教你点样做，喺中环条街度，我哋3个人打50几个人。（一个唔止打十个？）系呀！但最尾我都系死咗！」原来剧中姜Ｂ惨被斩死。


Lokman认为打戏好难控制，又易发生意外，拍时相当大压力，「我以前有学过吓少少武，但系到拍嘅时候真系好唔同，攞支棍就打，武指好彩系识嘅，佢哋叫我放心打，但系都有一两吓都搞唔掂，演嘅时候认真得滞，劈劈劈，啱啱打中咗佢哋。虽然有练习过，但系现场气氛有啲紧张，又有好多样嘢要顾，混战咁，好惊打亲人，又好怕唔用力唔似，要再拍多次。」姜涛都好认同Lokman话宁愿畀人打好过，「有一场同（吴）保锜打放心啲，哈哈！因为佢系朋友，打咗都唔紧要！」

宁愿演戏唔单飞


不过，讲到最难忘戏份，姜Ｂ首选跟德斌生离死别一幕，「我死得番一啖气，佢要喺我死前同我讲嘢，因为有大班fans喺隔篱睇住我断气嗰吓，我又知自己重喎！佢又好想拉我，但拉唔起，我feel到佢想拉，我嗰吓吸住啖气，我好想笑！（佢咁壮都拉你唔起，你嗰排好重咩？）都重㗎！总之好搞笑又好尴尬，要摊喺条街度畀佢咁。拍嗰场戏之前佢仲问我，『喂！你几重呀？』我话好耐冇磅，70几是但讲咗个数字。（Lokman：求个安心啫！）咁佢听完嗰个数字,『咁我唔抱你啦！』佢本身谂住孭我走！」至于Lokman就最难忘扮10几岁戏份，「我班兄弟，有《造星II》嘅Marco（叶振弘）同埋Tiger（邱傲然），我觉得最难忘要拍番中学生嘅时候，17岁嘅时候，好耐冇着过校服，点样演番细细个呀？！可能佢哋容易啲，但后尾大家拍得最好，因为唔理罗！推推撞撞咁一齐玩，反而嗰时拍得最开心。」



除客串《男排女将》同这次《太》剧，以及最近主持的《囝囝女女730》外，比起其他成员，Lokman演出机会不算太多，但他解释只是近期比较运滞，「其实唔系冇预，点知系咁啱，譬如旧年年中，我本身会过日本拍一个旅游特辑，,但因为疫情所以冇咗，成日我有呢啲问题，有啲情况就冇咗。」记者提议他过年去拜神，点知他竟然自爆，「我有去拜，前几排有去拜吓神，同埋因为年中我又拍咗套电影未上到，拜一拜求个安心。」谈到未有机会单飞出歌，Lokman完全唔介意，「有自己一套戏会开心啲，演戏同唱歌都好玩，但系我锺意演戏多啲，问心嘅，唱歌我冇乜非常非常非常大嘅信心占到一个席位嘛！」