【独家】《造星III》囝囝成抢手货 Ben CY KLAU未签ViuTV慢慢拣

热爆的《全民造星III》播完近一个月，一班参赛者依然人气高企，ViuTV即时食住个势上周推出由他们孭飞的《囝囝女女730》，而当中冠军的Ben（赵祥诚）、十强的「神经刀」CY（陈泽言）和KLAU（刘瑞祈）都有份演出。不过，原来三个囝囝仍未跟ViuTV签约，三人坦承都要睇定啲，由胞姐暂代经理人的Ben坦言有好多公司邀请，未来想走多元化艺人路线；而有姑姐暂任经理人的CY，亦承认有跟其他大公司接洽，最重要有机会畀佢继续唱歌；至于自爆旧年推了大公司邀请加入新组合的KLAU，亦有不少公司问津，但拣公司重视有创作空间。一班《造星III》参赛者，已成各大娱乐公司抢手货，嚟紧应该会keep住见到佢哋！撰文：杜淑霞 摄影：谭壹致、张咏森 发型：Keinoyip(CY) 化妆：tracyui.makeup(CY) 服装：D-mop(CY)、Octo_gambol(KLAU) 场地：The AIR (The ONE)(CY)、DreamSeekerStudio(KLAU)

Ben夺冠后，富裕家庭背景曝光，对此他坦承有压力，「我好想澄清番，我冇靠任何呢啲关系，我想证明畀人睇，靠自己可以点样行。」不过Ben承认参赛期间，家人确帮了很多，除了胞姐充当临时经理人外，原来其他家人会帮手筛选工作，「大大小小都帮咗我好多，因为佢哋知我应付唔到，譬如一啲工作机会，有啲人搵我，我应唔应该要覆啦！？冇可能咁多个全部都覆㗎嘛，呢啲位屋企人会帮手。我哋仲会全家一齐倾，倾我嘅形象，适合啲咩工作咁样。」而Ben亦承认，已有国际品牌合作邀请，家人亦有帮手接洽。Ben承认跟ViuTV有合作机会，「如果我想出歌或者拍戏，出面有公司帮到我，都会考虑签出面公司，但如果Viu想签我都会考虑。」而他未来想向全方位艺人发展，「我觉得冇冲突，好多艺人都系乜都会识咁样，除咗舞台剧，会想出自己嘅歌先，最想将外国兴紧嘅嘢带嚟香港。」

想做许廷铿师弟

CY参加《造星III》前，在尖沙咀酒廊「红馆」任职Bartender时，曾参加过该酒廊举行的歌唱比赛，夺得冠军而签了经理人，直到打入十强后才解约，由姑姐暂代经理人，「我同经理人入咗十强之后倾过，佢知道我可能有更加好嘅机会（而解约）。」CY透露虽然ViuTV未搵他倾，但有其他公司向他招手，据知更有大公司周围搵他联络方法，对此他答得尴尬又小心，「系！（好开心？）唔系，我讲咩呀！哈哈！仲喺度了解，佢哋搵我觉得可以帮到我发展更多可能性，会有少少开心，但系慢慢嚟。」早前他公开话想同华纳唱片合作，但对方未有邀请，「我成日都狮子开大口㗎啦！因为我觉得佢系间纯音乐嘅公司，同埋我又好锺意许廷铿喎！（想做佢师弟？）系啩！」而对于签公司他坦言想睇定啲，「首先我对呢行真系唔熟，等我多啲接触啲前辈了解咗咩事，突然有啲公司话想搵你或者话想签你，我个人好棹忌签约嗰啲嘢，会觉得好严重，一定会清楚了解晒所有嘢先至落决定。」



放弃加入PIX3L


参加《造星III》前，KLAU已经跟前公司完约半年，他承认最近有跟ViuTV倾合作，但大前题一定要给他制作歌曲机会，他更自揭去年曾获环球唱片邀请加入新组合P1X3L，但他竟然放弃机会，「环球系我好锺意嘅公司，但系嗰时啱啱完咗上间公司5年合约，第六日又有一份合约畀我嘅时候，我系咪要搵番我自己先，再去安排以后，我𠵱家谂番冇话可唔可惜后唔后悔，我唔强求，但系𠵱家欢迎有任何合作嘅机会。但做组合真系要睇吓人脚，呢两年慢慢打开咗自己一啲创作嘅能力，我都想一路keep住落去。」讲到见到PIX3L刚出道，KLAU坦承好开心，「呢个行业就系要有多啲竞争对手，先至会发热发光，组合得一队冇得斗，反而有5队10队，先至会多啲人关注。」