【独家】感激Eric Kwok引荐入乐坛 Mike获陈奕迅赞即标泪
2021-01-28 23:05 
《全民造星》又有囝囝加入乐坛，今次是《造星II》第8名的Mike（曾比特），比赛时出名唱得的Mike全靠当日导师Eric Kwok（郭伟亮）引荐入环球唱片，连新歌《我不如》亦包办埋作曲、监制兼执导埋MV，视Eric为师父的Mike话会做牛做马报答。不过Mike好争气，新歌已经打入商台903专业推介第5位，连偶像陈奕迅（Eason）都赞，搞到Mike开心到标眼泪。撰文：杜淑霞 摄影：张咏森 发型：Cream Mok @W workshop 化妆：Onetung Ma 场地：The AIR (The ONE)
Mike除了获Eric推荐签环球唱片，首支新歌Eric再度出手相助包办埋作曲、监制兼跟刘翁联手执导埋MV，他坦言受宠若惊，「要为佢做牛做马喇！当然自己要努力啲报答佢对我咁多嘅恩惠，希望嚟紧会继续同佢合作，希望Eric Sir永远睇住我。」对于Eric偏爱，Mike都有追问原因，「第一佢觉得我唱得都OK，第二系佢觉得我把声好啱唱广东话歌，虽然我有啲懒音，但系佢可以救到嘅。」
新歌《我不如》的悲情，Mike原来有亲身经验，中四、五跟个女同学经常出双入对，但首次表白却失败，「都唔开心咗一段时间，以为得米，好似成功追到个女仔，跟住竟然系咁。」他之后更为了个女仔去减肥健身，他有将这感觉放落新歌，「几次录音感触比较大，有眼红红。」Mike为加入乐坛再度积极减磅，搣甩近20磅肥肉，但自知卖点非靓仔，索性搞鬼电个爆炸头，更认为可靠多元化突围，「标签我唔靓仔，所以可以冇偶像包袱去尝试所有嘢。《造星》入面经验好帮到我，原来我喺唔同领域上面做到，奠定咗我无论咩style都做到个信心。」
Mike视偶像Eason为努力目标，虽然现在同公司，可惜仲未有有机会跟对方碰面，「真系奢望，因为佢系由细到大嘅偶像，如果有呢个可能性就好，但我自己都要努力，未去到一个位可以喺佢面前好从容。」不过Eric再为他带来好消息，有次同Eric做Live，佢话畀咗我首歌Eason听，嗰吓真系Oh my god!佢话Eason话我唱得都OK几好喎！我即刻标眼水，好激动，畀自己偶像咁样赞喎！」
最新回应