【独家】带囡囡剪第一次发 黄泽锋俾小黄妃冧爆
2020-12-17 23:15 
黄泽锋跟太太陈丽丽早前赶紧疫情第四波初现，即带16个月大囡囡熙恩（乳名小黄妃）剪人生第一次头发。面对陌生环境小黄妃最终都有爆喊，但好彩两夫妇带定她至爱食物，喊住剪都能在15分钟内顺利完成，泽锋笑指囡囡剪发后激似自己迷你版。泽锋坦承因疫情，错过好多跟囡囡留回忆机会，只好留家玩为主，幸好囡囡好识𠱁人，识叫「爹爹」仲送埋香吻，冧爆啦！撰文：杜淑霞 摄影：李维隆 发型：Bowie Lo 场地：ADmiX Hair Styling
泽锋夫妇见小黄妃到发型屋时瞓紧，即叫发型师Bowie快手帮丽丽先剪，差不多搞掂囡囡开始醒，丽丽话，「畀佢睇住我剪，等佢冇咁惊发型师都系好嘅。」果然到小黄妃开始剪，最初她只觉得好奇，未有异样，但剪了几分钟后开始不安，望住妈咪开始扁嘴再爆喊。好彩早有准备，她至爱的柠檬茶、山楂饼、紫菜同钙糖排住出场，最终快手完成这个第一次。
两夫妻都大赞囡囡表现唔错，泽锋说：「佢唔算反抗得好厉害。（太太：佢冇走，只系觉得你做咩摸我个头咁样。）」泽锋仲开心囡囡剪发后激似自己，「阿囡真系好似爸爸，爸爸望住你个样，真系好似望到我细个系点样，就系咁样啦！」现在囡囡开始变得黐身，不准爸爸出门口，在家又会跟出跟入，不过泽锋看来相当享受，「返工成日挂住佢，𠵱家有个好处，㩒个手机有视像，睇吓佢点，佢会走埋嚟锡个手机，唉！咁你点样呀！」不时叫「爹爹」的小黄妃，听见妈妈叫「亲亲」仲送埋吻冧爸爸，甜到入心的泽锋咀完话：「攞你命！呢条友仲惨过以前识女仔，真系冇佢符！」
不过因为疫情，泽锋冇得同小情人拍拖觉得相当可惜，「希望疫情快啲过去，我可以同个女周围去，影多啲相，留番啲记忆，佢细个嘅时候系点，但系𠵱家冇得咁做，影嚟影去都系屋企。」不过，幸好疫情未有对泽锋工作有太大影响，早前拍摄港台剧《电梯女郎》演有个20多岁囡囡的爸爸角色，他认为不断有演出机会，跟留长发及胡须的佬味造型有关，「如果我仲系babyface，我咁嘅年纪同后生仔冇得争，但系咁嘅look，成熟啲，佬味重啲角色会啱。」
最新回应