【独家】21岁细仔好乖陪买餸　马诗慧外卖饭团喂女

名模马诗慧(Janet)一家出镜率都好高，因为呢家人好锺意玩社交平台，特别系两个女，分别系下年嫁嘅28岁大女王曼喜（Kayla）及刚有拖拍嘅细女，25岁嘅王丽嘉 (Irisa)，两姊妹好身材又大方，IG经常大酬宾，巴打锺意传媒又有料写稿，真系唔该晒。讲返阿妈，之前佢同细仔，21岁王跃颖（Kadin）去铜锣湾行超市买餸，大只细佬陪住阿妈拣西兰花，阿妈买完餸又惊个女饿亲而急买饭团喂女，买完拿拿临返归。采访:梁志明

大女Kayla九月宣布同拍拖一年多的摄影师女友Elaine Chen订婚，下年美国结婚。未婚妻系恒隆地产创办人之一陈曾焘嘅外孙女，中环开设艺术活动空间，有背景又有事业，名模阿妈对呢位未来女儿都好满意，「呢个女仔几乖，最紧要Kayla自己锺意，我哋只系戥佢开心同祝福佢哋，最紧要系佢哋两个对大家好。」加上细女又开始拍拖，两个女都有另一半爱锡，Janet应该好安乐。

好细心嘅妈妈
日前傍晚，Janet同细仔Kadin去铜锣湾时代广场行超市买餸，两个女有另一半，唔得闲陪阿妈，好彩仲有个细佬。当日好大只嘅细佬全程陪住阿妈，冇行开过半步，有时绕住手等阿妈拣西兰花，又或帮吓眼拣啲日式小食，拣拣吓，Janet打电话畀个女，知道个女饿又未到晚餐时间，即刻拣多两个日式饭团先返归。