【独家】升呢火辣人妻咀爆谢东闵 王敏奕感激曾国祥给予发挥空间

近日TVB重播王敏奕（Venus）处女剧作《女人俱乐部》，当年Venus初出茅庐，乜都唔识好懵懂，相隔七年，换上人妻身份回归TVB，喺新剧《香港爱情故事》饰演叛逆女摄影师Shay，除咗同谢东闵激咀外，跟黄子恒和黄嘉乐都有牀戏，大胆程度比做女时更甚，她坚持，唔会因为私生活改变而改变演员工作，老公曾国祥畀佢好大自由度发挥。 采访：方骞平 化妆：King Yip @KingsMakeUp 服装：THE KOOPLES

王敏奕今次重返TVB，但感觉好不一样，「虽然系七年前合作过嘅副导（已升为导演），但佢要求做一个不一样嘅王敏奕，做一个从未尝试过嘅叛逆女仔。尤其喺感情方面，因为由细到大见到父母成日吵架，唔会相信承诺，会收埋自己内心真正感觉，甚至大搞一夜情……剧中人不论喺家庭背景同埋感情关系，同我好唔同，对我系一个挑战。现实生活中我好好彩，搵到一个愿同我行得远嘅人，可能我好识得表达感受，身边人自然会识得去关心我，大家有舒服嘅互动。」

剧中Venus最难忘跟谢东闵嘴咗好耐，她忆述说：「同佢嘴到熟晒，知道点样可以避开佢啲须根，明明喺围村好浪漫咁拍紧咀戏，佢啲假须拮晒落我块面度，每次都要补妆，连佢见我满面胡须都忍唔住笑。」至于老公曾国祥对她拍戏好信任，「我哋畀对方好大自由度，尊重大家嘅专业，讲真我拍好多嘢，佢未必睇，因为佢睇我作品，我会有少少紧张，佢要求比较高，我会觉得唔错先畀佢睇，不过佢冇弹我，喺佢心目中，我系个好好嘅演员，睇到我畀心机投入件事，尤其佢成日鼓励我，帮我做心理辅导，因为作为演员，长期处于被动状态，觉得自己俾人拣紧会好担心，佢会喺我唔好时候安抚我，话『就算几红演员都有被人拣嘅时候，大家都系经历紧同一样嘢，只要不断努力就OK。』」