【独家】爆胡鸿钧主动传短讯旧史 蔡思贝回味《踩过界II》被张振朗锡牙

三年前，蔡思贝凭《踩过界》哨牙「癫姐」一角擸走「最喜爱女角色」成功上位，最近播出嘅《踩过界II》中蔡思贝仍然为王浩信默默付出，又会同张振朗上演激烈牀战。思贝有感而发，表示入行后遇到好多贵人，包括好朋友兼好拍档张振朗，又有她的演戏启蒙老师王浩信，两人互相支持，当然仲有现役「好朋友」胡鸿钧。思贝仲大爆当年胡鸿钧点样主动撩佢，胡生追女仔都几Old School喎。采访：方骞平 摄影：张咏森 发型：kkingleeeeee 化妆：henryli_makeup 服装：iblueshk

今年TVB台庆剧《踩过界II》及《使徒行者3》都由蔡思贝同张振朗拍住上，两人在前者中有场饮大咗而发生嘅牀戏，好多身体接触，男方仲会锡女方棚牙，思贝笑言：「振朗好怕丑会面红，我反而叫佢唔使怕，我哋互相信任可以放开怀抱做到好多嘢。」

疯狂赞好张振朗

一提张振朗，蔡思贝讲到停唔到口，「我哋合作过好多套剧集，两个人嘅经历又好相同，会一齐喺演技上成长，好感恩生命中有呢个对手同朋友，特别喺低潮时，佢一直扶持我，系一种好幸福嘅事，如果拍住上夺视帝视后意义更大。」提到拍《踩过界》传过绯闻的王浩信，蔡思贝答得避忌：「浩信系『戏痴』，当年我同振朗演技幼嫩，佢启蒙我哋多啲，所以『三剑侠』个名系咁嚟。浩信教我哋『究竟演戏系乜嘢一回事？』『点样去分析剧本？』同埋『如何做戏先入到观众心呢？」问到近来演技被赞是否跟王浩信有关？她即时否定：「唔系，系历练，喺我生命上所有经历，包括我吸收返嚟嘅所有灵感，身边前辈、拍档互相学习，绝对冇归功一个人，我好好彩，同好多前辈合作过，好似张卫健、林峯、吴启华、陈豪等，尤其同张卫健合作拍《大帅哥》令我拍烂手掌，佢嘅工作态度令我铭记于心，每日Keep住团火唔会放过每场戏。」

浩信被感动到喊

由被插演技到获赞赏，思贝好开心，更爆王浩信赞她演技成熟咗：「佢话睇返Play Back，好多场戏都令佢感动到喊，即系我成功咗啦！」问到俾老师赞系咪好开心？她即更正：「我从来唔会叫佢做老师喎，佢纯粹启发我演戏，唔好将佢放大啦，佢唔系老我好多啫。」最后讲到「好朋友」胡鸿钧，「我哋系我初担女一嘅剧集《冲线》时经已合作，当时佢系演office boy。」一提「好朋友」思贝即刻好放松仲笑住爆：「我拍电影《陀地驱魔人》时，收过佢message赞我做得好好，因为呢样嘢我特别记得，我哋纯粹系《冲线》碰过头，点解佢无啦啦短讯我？跟住开始有合作，我哋系倾得埋嘅好朋友，佢好支持我，喺唱歌方面我都会问佢意见，佢会教我分析歌词。」再问两人关系，思贝答得熟练，「好朋友罗。」