【独家】照顾患胃癌男友冇觉好瞓 邱芷微类风湿恶化唔敢怀孕

TVB处境剧《爱•回家之开心速递》演「贾名媛」嘅邱芷微(Chelffy)患上类风湿关节炎，前功夫新星男友陈志忠又确诊第一期胃癌。日前邱芷微就陪男友去尖沙咀医肚兼睇医生，陈志忠切咗八份七个胃，主力靠肠道嚟消化食物，邱芷微将薄牛肉切到细细件嚟喂男友，食完帮佢抹嘴，呢啲最佳女朋友点搵呀？采访：方骞平 摄影：张咏森

当日陈志忠做完手术唔够一个月，仲系大大只，精神还不错，只系走路时，伤口仲会隐隐作痛，由邱芷微拖到实。两人先去医务所附近开餐，见邱芷微全程服侍周到，切完食物喂埋入男友口，最后仲帮陈志忠抹埋嘴，真系相当细心！

男友要做埋化疗
事后邱芷微接受本报访问时表示：「医生叫佢少食多餐，食物方面要切细旧啲，咬碎啲，但佢个人太心急仲未适应，成日食得太大啖，又冇耐性咬碎啲，次次我都会睇唔过眼帮佢切细啲。」原来当日她陪男友搵肿瘤科医生准备做埋化疗，讲返呢件事，邱芷微同男友都吓到癫：「呢个肿瘤科医生一度推翻之前化验报告结果，话肿瘤由1期B定位为第4期，需要做一个更大剂量打针化疗和食药化疗，之后更需要再做电疗，当时听到好无助，惟有再攞胃细胞组织去另一间化验所做化验，好彩报告结果同之前一样。𠵱家物色另一个医生做化疗。点都好，男友决定先雪精。虚惊一场，搞到我类风湿恶化咗，以前冇发炎嘅关节位，一吓子都发晒出嚟，呢个情况会几危险，咁落去好难会断到尾，只好趁住黄金医治时期，中西合璧治疗，否则第日佗B会影响BB心脏，好麻烦。」