【独家】长洲直击 疫情令计划被迫煞停 张惠雅开私窦自娱放松

张惠雅（Regen）早在18年已在大角咀开了飞机主题餐厅，今年本计划再做老板在同区再多开一间食肆，但因疫情被迫煞停，就连她去美国参加「PCT」（即太平洋屋脊步道），打算行足半年山的大计亦只好放弃。不过，她缘份却遇上长洲吉铺出租，趁住这段完全不可有计划的日子，开间私窦式餐厅，自娱之外亦成为朋友和粉丝的聚脚地，用这个空间齐齐玩吓放松吓！采访：杜淑霞、何智翘

Regen两年前落足心机搞飞机主题餐厅「The Galley by Cafe Proud Wings」，但今次开铺反而是无心插柳，「本身开咗飞机餐厅，谂住隔离再开多间，但系等咗成年都搞唔到，而本嚟4月去行『PCT』，但系因为疫情都唔系好敢去美国，变咗呢半年都唔知做乜好，好似大家咁啲计划煞停晒，咁啱有朋友问我租唔租呢个位做生意，啱啱我都想搵个好宁静嘅地方可以倾吓偈，做自己想做嘅嘢，系一个完全冇框框嘅地方，锺意做乜就做乜，冇乜规矩，畀人放松嘅地方。」

Live show虾碌连场


餐厅由Regen一手一脚打理，更会亲自做埋大厨，但由于筹备时间不足，暂时仲未有菜单，「我完全预计唔到10月接咗个job主持节目，呢个节目花嘅时间都好长，自己又出新歌（《自由流浪》），本嚟有空档去准备间铺，𠵱家变咗冇时间准备好急赶，铺头虽然未系好ready，但系好开心朋友同fans留言『唔紧要㗎！有个地方畀佢哋听我唱歌就够！』呢度好似畀我跳出一个制度，或者自己开个游戏出嚟，试吓自己有个地方做自己锺意做嘅嘢，唱歌呀！真系想冇压力之下或者束缚之下，去做自己锺意做嘅嘢。（暂时冇菜单？）大家锺意食啲咩，我尽量可以煮畀大家，我个人对味觉、嗅觉都系比较敏感嘅，可以煮到畀大家试吓，好似
Omakase（厨师发办）咁，哈哈！」


日前Regen已经首次在餐厅举行Live show，邀请朋友和Fans出席，有得食嘢兼听歌，不过当日发生不少虾碌情况，「我个人不嬲都虾碌嘅，嚟得嘅人都知道我不嬲虾碌开，所以我觉得大家会接受到我啲奇怪嘢，好似load极都load唔到啲音乐，4点开始4点半先唱到一两首歌，大家都好开心照样喺度。」Regen预告，除了搞Live show，更打算搞埋Movie night同fans齐齐欣赏电影，仲会筹办好多不同类型的Workshop，譬如：学冲咖啡、学调酒、wine品酒会及学换电话mon等。