男友陈志忠确诊胃癌 患类风湿关节炎 「贾名媛」邱芷微逆境下愁到爆

无綫处境剧《爱．回家之开心速递》的「贾名媛」邱芷微（Chelffy）同「大小姐」林淑敏系死敌，搞完「细龙太」陈伟琪，又挑战「龚水恋」，非常抢Fo，观众都好锺意睇佢「出招」带出嘅火花㗎！不过近月她就真系多灾多难，除咗发现患上类风湿关节炎，收尾好长令她烦爆外，前TVB功夫新星男友陈志忠(Wilson)近日确诊患上初期胃癌，周前要紧急切胃保命，幸而手术顺利，日后要少食多餐，多关注身体状况及变化。

邱芷微今日喺社交网留言为男友报平安：「呢几个月真系可以讲话多灾多难，不过都总算大步揽过。感谢大家对我及陈师傅Wilson嘅问候及关心。近排的确系有少少吃力的，因为自己本身都有类风湿关节炎，手脚灵活度都时好时坏，所以除了自己要经常睇医生之外，面对着Wilson突然变咗胃癌，上星期才做完切胃手术之后的康复生活亦有少少改变。好彩佢嘅体格本身都强，所以康复程度比预期都快。佢亦都系一个算系好勤力做research的病人去了解自己的病情，所以好多嘢，佢都好快咁寻求到解决方法。

以前我都唔了解我自己个病以及胃癌，但呢几个月真系因为双方的身体健康出了变化，令到大家除了珍惜眼前人之外，亦都想喺度同大家讲，就算平时工作有几忙，有时间真系要去做body check，仲有一定要买保险！今次我哋两个都算早发现的病例，所以唔好以为平时冇病冇痛就代表冇事。

关于经营演艺学院，学院仍然正常运作。我其实在Wilson入院的这段期间，我亦都照常在店内打点营业，课程仍然照常上的。如有任何有关课程上课，问题欢迎联络我大家放心，我会撑得住的。」

另外，她又留言表示：「知道大家得知Wilson Chan患了胃癌这个消息之后，身边认识我同佢嘅朋友都纷纷打俾佢之外，同一时间我亦都收到好多WhatsApp问候我，感谢大家关心。我哋一定撑得住，人生嘅嘢关关难过关关过，2020年总算是考验的一年，但我都会撑得住的。」

邱芷微接受头条访问时称，男友一个月先曾入浸会医院照胃镜，本来话系胃溃疡，但医生攞咗啲坏死组织去化验，出院之后冇耐返去睇报告，结果证实系胃癌初期，听到坏消息后简直晴天霹雳，好彩早发现冇扩散，之后她陪男友先后睇咗4个医生，单系周围睇医生都使咗好多钱，最后请来教授级医生操刀，手术顺利，买保险亦claim足，算系过咗难关：「所以呢排我就辛苦少少，自己本身都有病要成日睇医生做治疗，又要管理公司生意，同时要照顾佢，不过顶得顺嘅。」