【独家】娱圈B Cup「串星」有样有学历 邱芷微 李敏嘉硬攻娱乐圈

33岁「贾名媛」邱芷微（Chelffy）及27岁李敏嘉（Annabelle）喺即将上映嘅新片《时代》中结缘，客串演见习医生。两人有样有学历，因为热爱演戏唔介意做「串星」、甚至特约演员。问到点突围？邱芷微笑说：「我同人嗌交嗌得够大声！」李敏嘉就话自己够勤力同埋有自信心：「其实我个样都唔差啫，只系输喺冇乜幽默感，成日搞烂Gag！」采访：方骞平 摄影：张咏森 泳装：seayaa(李敏嘉)

邱芷微喺处境剧《爱．回家之开心速递》中演「贾名媛」，同「大小姐」林淑敏系死敌，搞完「细龙太」陈伟琪，又挑战「龚水恋」(吕慧仪同张景淳)，真系好抵打，但她坚持：「观众睇得开心，我咪嗌得落力啲罗！因为网民闹爆，有反应我先有得留低咋，好彩『大小姐』系个好对手，佢闹起上嚟好起劲，否则平衡唔到！佢会教我点做戏，喺佢身上我学到好多嘢，其实佢一啲都唔恶。」

邱芷微唔歧视拜金女

戏内嘅「贾名媛」贪慕虚荣爱钓金龟，戏外的邱芷微因为要尊重男友陈志忠(第一届《功夫新星》)，言行检点系真淑女：「我身边有好多呢类贪慕虚荣嘅女友人，剧中抛眉弄眼、搔首弄姿系学佢哋，我唔系发姣嗰啲，而且唔好名牌，不过，有前辈话做艺人要有名牌包包傍身，原来系咁，我长知识喇！」对于身边的发姣女友人，Chelffy坦言唔会睇唔起佢哋，「各有各做，唔会影响到我，要学坏，喺英国读大学时就变坏啦！坦白讲，冇人约过我去船P都唔信啦，但我冇去过，要打理公司(同男友合办武术学校)好忙，男友又唔锺意，要尊重另一半嘛。」

李敏嘉赞好发哥华仔

貌似「杨怡」的李敏嘉参加过2018年(该届冠军为陈晓华)港姐，最后因为面试时大搞烂Gag，畀现任邵氏电影执行董事及总经理乐易玲踢走，最后把心一横去咗北京中央戏剧学院进修：「都羡慕陈晓华，其实自己个样都唔错啫。」喺浸大珠宝系毕业嘅李敏嘉好爱演戏：「可以演到平日做唔到嘅嘢，我好想尝试做吓啲有气势角色，好似黑社会咁，我唔出声，尤其眼神可以呃到人。」讲到最开心的拍摄经历，Annabelle即答是拍《毒战》跟童年偶像黄宗泽合作，「场口系佢揽住我去激佢条女吴千语，哗！佢揽住我膊头喎，真系惊到心跳加速㗎！最记得首次拍戏，客串《赌城风云》见过发哥(周润发) ，佢真系好Nice，因为拍戏时唔可以影相，但佢趁冇人时主动过嚟问我『系咪想影相呀？快啲影啦！啲人喺度就唔影得㗎嘞！』跟住拎咗我部手机嚟自拍。」

Annabelle亦同刘德华拍过一套未上映嘅新戏，从中体会何谓专业。「片中我只系一个小角色，系合唱团成员，喺街头开粉丝聚会，嗰个场口佢经过条街，我差啲以为佢系导演之一，因为佢会留意所有细节位，就连路人甲点行都会教埋。」