【独家】「绿叶王」享受做任何角色 韦家雄明白游戏规则唔再乱谂

口碑唔错嘅TVB新剧《木棘证人》已播毕，男主角之一嘅韦家雄被网民赞好较罗子溢(前名罗仲谦)更抢戏，55岁的韦家雄是「绿叶王」，拍过超过60部剧集，2015年凭《枭雄》夺男配，等咗咁多年终有机会「升呢」，但他坦言同以前一样，「乜角色都做，𠵱家仲拍紧嘅戏，客串又有，单元又有，冇乜所谓。」采访：方骞平

好戏之人韦家雄被指抢晒罗子溢嘅戏，他即搞笑说：「我唔认同抢咗阿谦(罗子溢)嘢，如果真系抢咗佢嘅嘢，咁冇办法，佢惟有去报警啦！其实冇呀，阿谦好鬼好笑，喺剧入面成日引到我笑出嚟。」

韦家雄多谢观众锺意睇佢演出：「正确嚟讲系好彩我拍到呢套剧，我有问过点解搵我做呢个角色？导演话觉得我似『李浩帆』呢个人，就算演戏30几年先做男一唔会有压力喎，演戏从来唔谂边个系男一、男二、男三，只系有啲同事返工多啲，对白多啲，场口多啲咁罗！」韦家雄因为唔Like冇得做男主角及埋怨做闲角而曾经离开过TVB。他坦言每个人都以为自己做得好，但行咗出去一转返入嚟学多咗嘢，学会演戏及工作态度，𠵱家觉得一套戏每个角色都好重要，所以唔好分类：「𠵱家谂法唔同咗，工作、做人都变得舒服，锺意同我倾偈咪倾罗！艺人等同一门生意，做得好自然会有客上门，系睇用家需求。」