【獨家】「綠葉王」享受做任何角色 韋家雄明白遊戲規則唔再亂諗

口碑唔錯嘅TVB新劇《木棘証人》已播畢，男主角之一嘅韋家雄被網民讚好較羅子溢(前名羅仲謙)更搶戲，55歲的韋家雄是「綠葉王」，拍過超過60部劇集，2015年憑《梟雄》奪男配，等咗咁多年終有機會「升呢」，但他坦言同以前一樣，「乜角色都做，𠵱家仲拍緊嘅戲，客串又有，單元又有，冇乜所謂。」採訪：方騫平

好戲之人韋家雄被指搶晒羅子溢嘅戲，他即搞笑說：「我唔認同搶咗阿謙(羅子溢)嘢，如果真係搶咗佢嘅嘢，咁冇辦法，佢惟有去報警啦！其實冇呀，阿謙好鬼好笑，喺劇入面成日引到我笑出嚟。」

韋家雄多謝觀眾鍾意睇佢演出：「正確嚟講係好彩我拍到呢套劇，我有問過點解搵我做呢個角色？導演話覺得我似『李浩帆』呢個人，就算演戲30幾年先做男一唔會有壓力喎，演戲從來唔諗邊個係男一、男二、男三，只係有啲同事返工多啲，對白多啲，場口多啲咁囉！」韋家雄因為唔Like冇得做男主角及埋怨做閒角而曾經離開過TVB。他坦言每個人都以為自己做得好，但行咗出去一轉返入嚟學多咗嘢，學會演戲及工作態度，𠵱家覺得一套戲每個角色都好重要，所以唔好分類：「𠵱家諗法唔同咗，工作、做人都變得舒服，鍾意同我傾偈咪傾囉！藝人等同一門生意，做得好自然會有客上門，係睇用家需求。」