【独家】户口试过得几嚿水 入行10年靠一铺性感弹起 张秀文唔敢随便封胸

张秀文最近在新剧《木棘证人》，饰演罗仲谦（新名罗子溢）拍拖10年女友「Yuki」，贪慕虚荣后尾仲勾埋佬，虽然角色唔多讨好，但秀文完全唔介意，宁愿俾观众闹佢死八婆总好过冇发挥。秀文好珍惜每个演出机会，只因2010年参加港姐夺亚军入行后发展麻麻，试过头几年户口得番几嚿水搣住度日，到2015年凭着三点式「压胸」演出《超强选择1分钟》弹起，令她的机会同收入大增，所以就算唔想大家将焦点放在她性感上，依然唔敢随便宣布封胸，因为冇可能做到。撰文：杜淑霞 摄影：李维隆 发型：Kin Tam@aveda x IL COLPO 化妆：Pinko.C 场地：马哥孛罗香港酒店

对于《木棘证人》的「Yuki」被形容为港女角色，秀文不禁为「她」平反，「所谓港女系我哋太有独立思考，分析好多嘢谂好多嘢，对爱情若干年后，唔系盲目追求，对生活有一定要求，唔再好似细个咁童话式，个人变得现实咗。」虽然角色唔讨好，但秀文预了俾人闹，「可能会将你真人代入咗，你行过闹你死八婆，但我唔会介意，反而我惊做完呢个角色冇机会去洗底就弊啦！就算俾人闹都希望有更多角色。」


每个月等爆骚

秀文入行10年代表作欠奉，到15年凭着三点式「压胸」演出《超强选择1分钟》弹起，她坦承对于行性感，中间都有过挣扎，「当初性感、泳装呢样嘢令好多人注意我，我都开心嘅，确实嗰时自己唔系太多工作机会，咁大家呢种关注系令我突然多咗好多工作机会，令到好多人认识，不论系公司或者外面。」


学懂珍惜只因秀文试过节衣缩食的日子，「最霉，试过一个月得几千蚊人工，强积金都唔使交嗰种，好痛苦㗎！每个月计住度住，睇住银行户口出粮未？爆骚未？一路未爆骚嘅时候，头嗰8个月系好难捱㗎！尤其系临近爆骚嗰两、三个月，前面几个月我都唔敢乱使钱，嗰几月我都可以搣，但搣搣吓唔得啦！见住个银行户口由5位数到4位，第8个月4位变3位真系会谂，下个月再唔爆骚我死㗎啦！但通常好好彩喺下个月我就爆骚啦！（得番3位数点捱？）我系个几未雨绸缪嘅人嚟，我又唔系好多消遣，用几百蚊搣罗！搭车同返工咁。我本身都唔系食好多嘢，我好随便食碗牛腩河都好OK，一日一餐罗！」

再拍拖望结婚

太难捱的日子，秀文甚至想过离开娱乐圈，「过咗两、三年谂过不如转行，但我唔系行动力咁快，入咗呢行有一定知名度，突然转行唔系咁容易。」当然她最终冇离开，反而成为工作狂，「我连旅行都唔愿去，我怕会错失机会，成个生活工作占咗我八至九成。」既然机会难得，令秀文更加唔会放弃性感，更难讲明要封胸，「近呢几年我会减低用呢件事去吸引注意，但有时啲晚装真系唔通买樽领咩，好难完全话封胸，我自问做唔到完全封胸，所以冇提过呢个字眼，叫你唔去谂就会唔提身材呢样嘢咩，咪自然地着适合我嘅衫，中间都好矛盾，既有利又有弊，唯有调整自己心情同时强化自己优点，有其他嘢吸引人。」



秀文自从去年跟前经理人Victor（仇耀斌）7年情玩完后，感情未有着落，但她坦承若再拍拖，期望能跟对方开花结果，「冇话好积极去搵，但内心系煎熬嘅，唔系恨拍拖，系想要一个安定嘅人，搵到就系嗰个可唔可以？我唔想再经历多一次认识、热恋、闹交、分手，我希望对方就系结婚对象。」讲到对象要求，她认为沟通最重要，「要搵一个控制到我情绪嘅人，因为我系好容易收埋自己，嬲我都唔会话畀你听，但我个心会画个正字，你都唔紧张我嘅一下，你都唔在乎我嘅一下。（前度系咪衰呢啲？）其实对我几需要耐性，以前嗰啲（男友）会觉得好突然，点解嬲咗？可能我积咗好多个正字。我系好付出型，好迁就对方，少要求对方为我做嘢，但其实咁样可能系错。」