【独家】官司败诉和牛店被淋红油 麦长青自责冇用狂呻食紧谷种

早前受官非困扰嘅麦长青（麦包）因为疫情冇工开，与友人合资7位数于大坑卖和牛，疫市自救。点知一波多折，开业仅3个月的和牛店跟附近两间店铺周前齐被淋泼红油。此刑毁案件令麦包相当无奈：「我都唔知发生乜事，所有嘢已交畀警方处理！」讲到目前经济状况，麦包无奈叹气表示食紧谷种，仲话「都食咗成年。」采访：方骞平 场地：御牛@大坑京街

6年前，麦长青妻子林孜因误堕手机炒卖骗案而被骗逾400万元，引发钱债纠纷官司诉讼，麦包亦受牵连，除失去做主角机会，同时受到滋扰被人追数。麦包及后入禀高院禁止对方再作损害其名誉的行为并索偿800万港元，法官裁定麦包败诉，同时亦驳回被告要求麦包赔偿118万港元的反申索。麦包坦言对方在庭上同意他不是骗徒，亦接纳他是受害人，让他得以讨回清白，总算系一个了结：「呢个世界就系咁，法律讲程序，还清白唔系骗徒就算，亦庆幸再获生意partner信任，所以老人家讲得啱，个天关咗你度大门，都会开返个窗畀你，所以我系记事唔记仇，记事系会令你进步，知道点样抹走啲伤痕，但记仇会令你唔舒服。」

疫情下被迫转型
对于和牛店被淋泼红油再次面对波折，麦包强调影响唔到佢：「上天要考我牌啩，唉！关关难过关关过，打开门做生意就系咁，唯有做好自己，其他交畀警方处理，担心唔到咁多，最重要行得正企得正，我都系照常咁开工，红油事件应该唔关我事，至于关边度事我又唔去猜测。」麦包经常喺和牛店坐镇做「生招牌」吸客，更会亲自送货一脚踢。「幕前工作有年多冇工开，都要为自己打算吓，最大问题唔知疫情几时完，咁啱朋友代理日本和牛，要搵个合资生意拍档，决策时间好急，喺4个月内要敲定，你唔得人哋就搵第二个做。」因为见疫情下好多人会买冻肉返屋企煮，所以虽然坊间都有好多冻肉店，但麦包都相信只要服务质素好兼价钱公道都有得做，「我主持过《街市游乐团》系列都帮到手，起码我识食，好多人为我而嚟买。」

自责孭唔起头家
麦包老婆同大女麦淳琳都有帮手，考获初级品酒师牌嘅囡囡做Part Time设计餐牌及Sell清酒；老婆就做文书，对客兼收钱，他笑言自己乜电脑都唔识，负责做吉祥物，「和牛店变咗系成家人嘅生意，亦即系证明我冇乜用啦，孭唔起头家，我都想做大男人，等老婆留喺屋企，但𠵱家唔得，佢都要出嚟帮手喇，以前点叻都冇用，𠵱家先系最重要。」讲到目前经济状况，麦包无奈叹气说：「尽力啦！我食紧谷种，就快食晒喇，都食咗成年啦！拍嘢好得意，拍开就个个人都搵你，断咗就冇人搵！惟有又试吓转营，好老实，啲钱唔投资放喺度，可能只顶到一年。我𠵱家自由身，边个搵我拍嘢都得，包括TVB，不过佢哋搵我先算啦！目前最紧要屋企人健康，大家搵到餐食，最想过『低叹』生活，即系低调地叹世界。」