【独家】撇低爱女 拖老婆西贡食碟头饭　陈展鹏盲舂舂去打Golf摸门钉

近年升呢人夫兼人父的陈展鹏好黐家，唔使开工就会留喺屋企陪家人，所以成个IG都贴满1岁半爱女陈诺瑶（小猪比）的萌照。「前世情人」抵锡，但他都冇忽略爱妻单文柔（Phoebe），闲时又会陪对方High-Tea、行山、打高尔夫球。早前《头条日报》记者便拍得一身Golf Look的陈氏夫妇现身西贡市中心，两人选择帮衬茶餐厅食碟头饭；医饱肚仔后，两公婆就驾车到乌溪沙高尔夫球场，惜疫情下场地冇开，自己唔Check清楚真系冇计，打唔到Golf唯有返归凑女。采访：张咏森

43岁陈展鹏自从18年迎娶细13岁的落选港姐单文柔，并于翌年诞下女儿陈诺瑶后即变身「爱妻号」兼「女儿奴」，经常于社交网晒家庭生活照！荣升老窦后，虽然要密密拍剧赚奶粉钱，但展鹏一得闲就会帮手凑女，留喺屋企同囡囡玩、为囡囡拍下成长纪录，可谓锡到个女燶；而为了不让陈师奶呷醋，曾经公开冧爆指Phoebe「像阳光般把自己融化」的展鹏，亦会百忙之中抽空陪老婆行超市，又会陪老婆食自己最怕的Afternoon tea。


大碟夹抵食
早前主演剧《超能使者》终于煞科，唔使开工的展鹏便跟Phoebe撇低爱女过二人世界。当日下午2时许，两公婆以一身高尔夫球Sporty Look驾车到西贡市中心觅食，泊好车后，他们先步行到一间西餐厅攞位，估计已经坐满客，二人就索性到附近的茶餐厅医肚。而今次轮到Phoebe陪老公享受「男人的浪漫」，两人一坐低点了两份50几蚊的碟头饭，包例汤又有嘢饮都只系百几蚊，真系经济又实惠！其间夫妇俩又边食边倾，食到饱便各自做低头族，全程逗留约45分钟先去埋单。

车河一日游
随后Phoebe入咗一间面包铺扫走一袋包，企喺门口等的展鹏一见老婆行出嚟，即好Sweet地同对方一个胶袋两份拎；然后双双步行至另一间Cafe，待Phoebe买完咖啡后，他们便取车直驶至乌溪沙高尔夫球场。未料长途跋涉去到球场闸口，由于政府于上月11日才放宽社交距离措施，当时娱乐场所及运动场一律仍勒令关闭，游咗一轮车河的陈氏夫妇，最终发现高尔夫球场冇开便无奈返归。