同两岁儿子开30人生日P 张震岳High爆伸脷

46岁的张震岳同老婆小涵拍拖7年，18年9月初为人父母，一向热爱户外运动嘅张震岳最锺意带埋个仔去行山去海边玩，有时又会同老婆去露营享受二人世界，生活相当写意。曾经讲过唔识同小朋友沟通，不过一有时间就会孭住囝囝同带住爱犬出去晒太阳呼吸新鲜空气。

上周系张震岳嘅饼印囝囝小谷沐嘅两岁生日，呢位老窦好有心，叫埋大班朋友，有大有细返屋企开生日Party，咁多人一定好嘈，最难得冇限聚令又唔使戴口罩，一班大人同细路玩足一日，最重要间屋够大，可以喺屋企一角Set个汽球池，一班小朋友喺入面玩到癫晒，鬼杀咁嘈，张太拍片期间，张震岳更笑晒伸晒脷入镜，仲忍唔住举起Rock And Roll手势。呢位有型老窦话囝囝玩咗成日，夜晚九点冲完凉即刻瞓著，而佢亦跟住瞓咗，不过张太厉害，「剩下妈妈们续pa到凌晨两三点！」