【零避忌】用烟花蜡烛整蛊细仔 乔宝宝唔怕食飞沫蛋糕
2020-09-29 11:30 
月前返港拍完电影《时代》及中印独立电影《我男友系好差》，乔宝宝经已返回苏格兰「交人」，因为答应过，喺9月21日现身陪细仔「乔宝贝」庆祝17岁生日，呢个老窦果然守信用。细仔生日当天一家人开开心心，齐齐食印度餐，因为疫情关系，要严守社交距离，乔家分两枱座，每枱规定大人唔可以超过6个人。
不过，一家人围埋切蛋糕仍然相当温馨，乔宝宝仲用潮物，烟花蜡烛整蛊囝囝，玩嘢话17岁要吹够17次，蜡烛先可以熄灭。听话囝囝好用力系咁吹，口水花喷晒喺蛋糕面，好搞笑，但喺疫情下，系人都怕怕飞沫喎！乔宝宝接受头条娱乐访问时就坚持话冇有怕：「怕咩呀？都系屋企人食返(蛋糕)啫！其实每次吹亲蜡烛，一定有口水喺蛋糕度，不过，佢系特别吹得犀利嘅，唔紧要啦，等佢开心啲罗！」
由于细仔病行动不便，乔宝宝最想儿子身体健康，继续活跃：「我都半退休罗！𠵱家多啲时间畀佢，同佢做运动，等佢健康成长。」
提到新冠肺炎毒疫情肆虐英国，当地单日确诊人数持续上升，苏格兰格拉斯哥大学疫情更大爆发，而港府亦因应英国疫情恶化，决定将英国列入高风险地区名单。居于格拉斯哥嘅宝宝坦承自己好邪：「冇办法，我跟住疫情走，当日香港大爆发时，我喺印度飞返嚟派口罩；到香港疫情缓和时，我就飞返去疫情最严重嘅英国；上两个几月前再返香港时，香港疫情再爆发，嗰阵时成个苏格兰确诊数字系有史以嚟跌到最低，𠵱家香港疫情受控，相反苏格兰情况恶化，真系命里有时终需有，命里无时莫强求，所以都唔惊得咁多罗！」
最新回应