【独家】万人迷桥王 Sales佬上身 姜涛爆笑自夸冇桥可搵佢

姜涛出道以来人气劲旺，每次有新歌推出都成为热话，粉丝对他死心塌地，虽然有人认为他好命，但其实呢个世界又点会有莫名其妙的成功！姜Ｂ接受《头条日报》访问，就自爆早在未入行仍是肥仔时，已开始自度舞台上的表演方式，所以由参加《全民造星》到最近亲自执导新歌《孤独病》MV，都一直有桥用。自封「桥王」的姜Ｂ，更得戚话大家要idea可以随时搵他，他仲Sales佬上身，「无论你高budget定低budget都可以因应状况调整。」哗！唱得跳得又靓仔，仲要有桥，仲边够你玩先姜Ｂ！撰文：杜淑霞 摄影：李维隆 发型：Lydia Yung、Denny Ku@Chic Private I Salon 化妆：Giann,[email protected] Centre 服装：D-Mop 场地：JAS Party&Studio

姜涛首次听到林奕匡度身订造的《孤独病》，好似搵到一生中最爱，「真系好似拣女朋友咁一见锺情，呢个冇办法用言语去表达，系佢就佢啦！呢个系同你过世㗎啦！我都系信一见锺情，所以当咗呢首歌系女朋友咁日日听，好爱呀！」他更希望再度跟林奕匡合作，「我应承教佢跳舞嘛！希望佢下只系唱跳歌，我可以帮佢度吓点跳舞，我觉得歌手系要寻求突破嘅。（花姐：你嘅突破系咩，咁劲？）唔系，希望林奕匡前辈都试吓跳唱。」




体形成最大困扰

身为独子的姜Ｂ好明白孤单感觉，所以用作新歌主题，原来他入行后孤独感都冇停过，「外界对你猜测、批评，自以为好了解你，甚至有时屋企人都会嚟问你，有冇做过呢件事，譬如有时唔系肥系肿，跟住屋企人嚟问我，到底你系肥定肿，我话『阿妈你养我咁多年都唔知我肥定肿咩？』（体形系最大困扰？）冇错呀！类似呢啲好少事都会（孤单）。」不过姜涛坦承上次现场唱《蒙着嘴说爱你》失准被指咬字不清更严重，「咁我正职系歌手嘛！（肥）呢啲纯粹系一啲表面嘅嘢，歌手就系以唱歌搵食，当你连自己搵食嘅嘢都未做好，系应该几丢架嘅一件事，所以听到呢啲批评冇办法，唯有接受罗！」讲到事件最大得着，姜Ｂ竟然仲识得讲笑，「得着系以后唔好拣咁高音嘅歌唱，高音都差唔多啦！《蒙着嘴》嘅高音现阶段已经系极限，如果大家想听高音可以搵阿Jer（队友）。」但姜Ｂ有努力改进，现在每日跑步都会唱一次自己4首个人作品，「系咪好自恋呢件事，（唱《蒙着嘴》应唔应付到？）暂时未应付到，仲未可以边跑边唱到呢只歌，但系试紧啦！」

未敢为MIRROR度桥

由于是独子，姜Ｂ惯了自己解决问题，令他变得特别多谂头，新歌主题早在一年前想好，「呢首歌唔系录咗好耐，但系个idea谂咗好耐，我成日会谂好多idea，以前未入行仲系肥仔嘅时候，会幻想好多舞台表演嘅方式，到参加《造星》时候攞呢啲嘢出嚟，今次呢首歌就系啱我脑海中嘅画面。（谂咁多桥使唔使写低？）唔使，我会自动save，你𠵱家想要咩idea我都可以话畀你听，以后大家要idea可以搵我，我随时度畀你，我连之后第三、四首歌嘅idea都度好，差在歌未拣咋，我𠵱家就系针对呢啲idea搵一只啱嘅歌。」姜Ｂ愈讲愈兴奋，「哗！演唱会idea我都谂好咗。（咁劲？）劲呀！同埋我真系好想畀个好劲嘅Surprise大家。（成队组合表演嘅idea？）成队未轮到我谂，我净系谂自己嗰part，成队公司都可以搵我嘅。（花姐忍唔住插口：多桥唔等如buy你！）唔系，我自己嗰part佢buy咗啫！」劲cute的姜Ｂ开始认叻，「桥王𠵱家叫我桥王，（新晋桥王OK！）无论你高budget定低budget因应状况调整。（𠵱家广告杂志？）我今次都系因应MV嘅budget做设计。」