被队友Stanley寸偶像包袱重　姜涛家中戴口罩同帽开Live唱歌仔

MIRROR成员姜涛和邱士缙（Stanley）上月飞抵台湾拍偶像剧，因为要半年后先同香港嘅「镜粉（MIRROR歌迷专称）」见面，所以两人都好识做，频频于社交网出Po、开Live慰藉一班粉丝，昨晚姜涛就喺IG直播做Music Live，与友人即兴弹结他、唱歌仔，事后他都节录咗其中两段同网民分享，包括演唱队友Anson Kong（江𤒹生）的新歌《蜗牛》及张敬轩的《断点》，一众镜粉纷纷留言赞好听，有人仲表示听到「耳朵怀孕了」。

不过最好笑，是一开波见到贪靓的姜涛遮晒面上镜，片中一身家居服、似是斟完水路过的Stanley笑谓：「哗！喺屋企戴口罩，Oh my god！哗！戴晒帽咁样，偶包（指偶像包袱）重到呢！」语毕姜涛笑咗两声，然后唞咗啖大气就叫伴奏嘅朋友仔练弹一吓，当Set好镜头准备开金口之际，姜涛望一望侧边忽然爆笑，镜头一转，原来Stanley为配合姜涛的「偶像Look」，搞笑地戴上黑超、Cap帽，并拎住杯水坐喺旁边笑道：「得你有偶包呀，我冇咩而家？！」场面爆笑！