【独家】睇《过街英雄》动作戏就被踢 谭凯琪估BB性格活泼好动

谭凯琪（Zoie）最近在剧集《过街英雄》饰演森美的女神、画家「Nadia」，由于她6月宣布有喜，在疫情下只可接受电话访问宣传该剧。她表示预计BB年底出世，迟些才会公布性别。她坦承最初陀B颇辛苦，胃口差兼瞓不到，现在情况有所改善，更相信BB性格较活泼，因她每晚追看《过街》时，见到动作戏都会踢她，相当搞笑。采访：杜淑霞　摄影：ctkkit 形象：Jacky & Jenny & The Styling Concepts 化妆：Aiko Tsang 服饰：Tory Burch、The Styling Concepts

疫情关系Zoie除了产检或者购买BB用品外，都好少出街，「冇乜必要都唔出，始终会担心啲，𠵱家连老公收工返屋企，我都会将佢全身喷晒消毒用品，先可以入屋同掂我。」由于疫情反覆，为安全计她已决定开刀生产，「开刀好多嘢都可以早啲安排，少啲风险大家都会安心啲，始终唔知疫情会有咩变化。」

Zoie坦言可能头一胎，陀Ｂ特别辛苦，特别是初期，「开头真系冇乜胃口，同埋瞓一阵就醒，最多瞓到三、四个钟就醒，不过𠵱家情况好咗好多，但磅数唔算增加咗好多，只系肥咗10几磅，所以我郁动都仲几灵活，有时都唔觉得自己有咗。」她认为能够长胎唔长肉，可能跟一日三餐亲自下厨食得健康有关，「𠵱家我三餐都系自己煮，都会食好多有营养嘅食物，譬如有鸡蛋、奶、黑芝麻同蔬菜。」



由于不能亲自协助宣传，Zoie每晚会坐定定追睇来支持《过街》，不过竟然肚内BB比她更兴奋，「我𠵱家每晚都唔会miss《过街英雄》任何一段，但系每次睇亲啲动作场面，BB就会踢我，好似睇得好紧张咁，可能佢都系个活泼好动嘅小朋友嚟，仲有我瞓低佢都锺意踢我，感觉真系几得意㗎！」讲到生B后何时复出，Zoie认为要睇自己及BB身体状况决定，「虽然请咗陪月同家佣帮手，但都要睇身体状况同埋疫情，不过我好锺意演戏，老公亦好支持我工作，所以一定会再拍剧。」